Accessibility links

Prezidan Obama Deklare "Abraham di Sètase" sou Rediksyon Taks Tanporè a

  • VOA Nouvèl

Prezidan ameriken an Barack Obama

Jedi 22 desanm 2011 la, Prezidan Barack Obama pran lapawòl yon lòt fwa ankò pou l kritike repibliken yo pou pozisyon yo pran sou plan rediksyon tanporè taks la pou 160 milyon travayè ameriken.

Vrèman vre, enpas politik Lèzetazini ap viv jounen jodi a mete bab pou bab kan repibliken ak demokrat la e li chita dirèkteman sou kantite tan yo dwe pwolonje rediksyon taks tanporè a.

Chanm sena a, ki anba kontwòl demokrat yo kounye a, te vote semèn pase a pou pwolonje pou 2 mwa ankò rediksyon taks sou salè moun ap touche, yon demach ki ta pral bay palmantè yo plis tan pou travay apre sou detay yon ekstansyon ki pral dire yon lane.

Sepandan , depite repibliken nan chanm bas la vle pwolonje yon lane a la pou la, e madi pase yo vote kont mezi sena a vote sou kesyon rediksyon taks la. Mèkredi 21 desanm nan, Prezidan Barack Obama telefone prezidan chanm dè reprezantan an , depite repibliken John Boehner , kote li mande pou l chanje pozisyon li pran sou vòt sena a.

Pòtpawòl lamezon blanch la, James Carney, di se yon pwoblèm yo te rezoud nan chanm sena a, e enpas sila a reprezante yon menas pou relans ekonomik nasyon amerikèn nan.

"Ensètitid nou dwe elimine a, se ensètitid sitwayen ameriken yo genyen kounye la a pou konnen si kantite y ap peye sou salè yo pral ogmante oubyen si l pa pral ogmante nan dat premye janvye k ap vinn la a. Gen yon konpwomi tou 2 pati yo apiye, e ki disponib pou anpeche sa rive. Sèvi ak konpwomi sa a, sèvi avèk li."

Pòtpawol lamezon blanch la kontinye pou l di : "Prezidan Obama fè depite repibliken John Boehner konnen aklè ke pwolonjman sou rediksyon taks a kou tèm sa a, se sèl opsyon ki egziste pou anpeche yon ogmantasyon enpo nan salè anplwaye yo isit Ozetazini."

XS
SM
MD
LG