Accessibility links

Breaking News

Etazini-Eleksyon: Yon Lòt Deba Kandida Demokrat yo Dewoule Jedi 14 Avril la nan Brooklyn, New York


Kandida Hillary Clinton ak Bernie Sanders pandan deba pati demokrat la ki dewoule jedi 14 avril 2016 la nan Brooklyn, New York. Oganizatè : Chèn Televizyon CNN.

Ozetazini 2 kandida a la prezidans pou pati demokrat la, senatè Bernie Sanders ak ansyen Sekretè Deta Hillary Clinton, patisipe nan sware jedi 14 avril 2016 la nan yon deba byen chofe nan vil New York (pi presizeman nan fobou Brooklyn) 5 jou anvan eleksyon primè ki pral dewoule nan Eta New York. Mesye-dam yo twoke kèk pawòl byen pike lè yo tap reponn pi fò kesyon yo.

Kandida Bernie Sanders
Kandida Bernie Sanders

Pa egzanp, Senatè Sanders di li doute Madam Clinton genyen bon jijman ase pou l okipe plas Prezidan ameriken an; e li bay 2 ilistrasyon pou l montre rezon-dèt opinyon sa a:

1.-Lè kandida Clinton te senatè, li te vote pou l apiye Lagè Irak la;

2.- Kandida Clinton te asepte lajan gwo bank yo ak gwo konpayi yo nan Wall Street te ofri li pou yo te ede li mennen kanpay li.

Men Misye Sanders pa rive bay prèv pou apiye deklarasyon kote li di Hillary Clinton te defann enterè gwo bank yo lè li te senatè.

Kandida Hillary Clinton
Kandida Hillary Clinton

Madam Clinton te eseye wete nan deba yo yon fwa pou tout kesyon moun ap poze sou kòb li ta resevwa nan men gwo enstitisyon finansye yo pou l te patisipe nan reyinyon yo epi fè diskou an favè enterè yo. Se konsa li dispoze pibliye kopi diskou sa yo; men li poze kondisyon pou sa. Hillary Clinton deklare:

“An nou aplike menm règ-jwèt la pou tout moun. Lè tout moun va fè menm bagay la, m a fè l tou. An nou fikse menm règleman yo pou tout moun pou sa k konsènen lajan taks moun resevwa… epi ann avanse.”

Senatè Sanders te bay opinyion pa li sou menm sijè a; men li di moun pa ka konpare dosye li sou kesyon an ak dosye Madam Clinton.

“Mwen pral pibliye kopi tout diskou mwen te fè sou Wall Street ak tout pòt fèmen. Men mwen pat fè yo pou 225 mil dola, ni pou 200 mil, ni pou 5 kòb. An fèt, nou pat fè okenn diskou nan sans sa a; epi, dezyèmman, nou dispoze pibliye dosye taks nou yo.”

Tou lè 2 kandida yo gen anpil moun dèyè yo nan Eta New York. Sepandan sondaj ki te fèt anvan deba jedi swa a te dewoule, montre Hillary Clinton genyen yon avans 2 chif sou Bernie Sanders sou plan nasyonal la. Se konsa tou, Madam Clinton genyen yon bon avans pou kantite delege li deja ranmase --sa ki ogmante enpòtans eleksyon primè New York la, paske Kandida Clinton pa lwen atenn chif ki nesesè pou l jwenn nominasyon demokrat la menm anvan konvansyon pati a.

XS
SM
MD
LG