Accessibility links

Etazini-Jistis: Ansyen Kolonèl nan Lame Amerikèn, Dr. Joseph Baptiste Anba Akizasyon FBI pou Rakèt


Dr. Joseph Baptiste, yon dantis ak byen koni nan kominote ayisyèn nan Maryland

Yon kolonel retrete nan lame amerikèn e fondatè yon òganizasyon nan diaspora ayisyen an ap fè fas ak akizasyon ajans federal FBI poutèt li ta pran lajan anba tab pou fè apwouve yon pwojè 84 milyon dola pou bati yon pò ann Ayiti.

Joseph Baptiste, yon dantis ki gen yon klinik nan Silver Spring nan eta Maryland toupre Washington, tonbe anba akizasyon yè mèkredi a pou 6 vyolasyon, pami yo yon ka konspirasyon ak yon ka lavaj lajan.

Otorite yo depoze plent la kont li nan eta Massachusetts nan nodès Etazini. Doktè Baptiste ta reyalize kèk pati nan plan li a nan kapital eta a Boston, e ann Ayiti. Ka li a te atire atansyon gouvènman ameriken an nan yon ankèt an 2014 sou kèk òm dafè ayisyen-ameriken ke otorite ameriken yo sispèk kòmkwa yo ta chache peye otorite nan gouvènman ayisyen an anba tab pou yo ka fè kèk biznis pwofitab nan peyi Karayib la.

Dokiman ofisyèl tribinal la fè konnen Msye Baptiste ki gen 64 lane, tonbe anba akizasyon kòmkwa li ta konplote "pou peye otorite etranje anba tab pou l ka jwenn biznis e kenbe yo", biznis ki konekte ak yon pwojè pò nan Môle Saint-Nicolas, sou kot nòdwès Ayiti. Dokiman an akize l tou kòmkwa li ta chache fè 50-mil dola pase sou kont òganizasyon ki pa pou fè benefis, ke li te fonde, ki se Òganizasyon Nasyonal pou Avansman Ayisyen, Inc. ki gen ti non NOAH. Òganizasyon an sipòte demokrasi ann Ayiti, ansanm ak sekou medikal e imanitè nan peyi a, dapre sèvis enfòmasyon Guide Star. [[https://www.guidestar.org/profile/52-1864566 ]]

Dokiman akizasyon an fè konnen Doktè Baptiste te sèvi ak lajan sa a pou afè pèsonèl li.

Avoka k ap defann Dr Baptiste, Donald Laroche, di LaVwadlamerik kliyan li an te resevwa 50 mil dola sèlman pou envestisman. "Yo pa gen okenn prèv ke sete yon ka kòripsyon," se sa Mèt Laroche di Lavwadlamerik nan telefòn jedi 5 Oktòb la.

Mèt Laroche fè konnen li atann ke Mesye Batiste prezante nan yon tribinal nan Massachusetts nan semèn k ap vini an.

Jounal Miami Herald, nan yon atik ki parèt yè mèkredi a, eksplike ke Msye Baptiste sete "yon manm kominote ayisyen-ameriken an ke anpil moun te bezwen kontakte." Jounal la fè konnen li te sèvi tou kòm "konseye ki pa ofisyèl pou Depatman Deta ameriken" sou kesyon Ayiti e "te konn resevwa regilyèman diyitè ayisyen - ak Demokrat ki t ap mennen kanpay pou eleksyon nan gouvènman ameriken an - lakay li" nan Fulton nan eta Maryland.

Lavwadlamerik te rele nan nimewo NOAH e yon anplwaye te reponn nan klinik dantè Dr Baptiste la nan Silver Spring nan eta Maryland. Msye Baptiste pa te disponib pou pale ak nou.

XS
SM
MD
LG