Accessibility links

Dout Kontinye Plane sou Sante Ekonomi Mondyal la

  • VOA Nouvèl

Dout Kontinye Plane sou Sante Ekonomi Mondyal la

Ann Azi e sou kontinan ewopeyen an, mache yo ouvè madi 9 out 2011 la avèk tranzaksyon ki fèt a la bès pa rapò ak jounen lendi 8 aout la, nan moman envestisè yo ap reyaji devan yon degradasyon kredi gouvènman Lèzetazini an ki desann nan yon nivo moun pat janm wè nan listwa peyi a. Yon lòt eksplikasyon se le fèt ke pwoblèm dèt kèk peyi ewopeyen ak kwasans ekonomi mondyal la pa sispann bay kè-sote non plis.

O Japon, Nikkei la (ki se endis endistriyèl peyi a) fèmen jounen an ak yon bès 1,68 % sou valè li te genyen lendi. Konsa li fè yon remonte aprè li te anrejistre yon bès plis pase 4% nan mitan jounen an. Daprè sa analis yo di, gen kliyan ki te prezante avèk espwa yo ta pral jwenn kèk bèl obèn. Lòt kote sou mache azyatik la, nan Honk Kong endis hang sang nan fèmen jounen an avèk yon bès 5,66% tandiske nan Sewoul endis KOSPI a desann rive nan pwen ki pi ba a depi plis pase yon lane. Ekonomis Francis Lun, ki se direktè konpayi finansye Lyncean Holdings, bay kèk eksplikasyon.

«Se dabò rezilta gwo chit mache ameriken an te anrejistre vandredi pase a kote Down Jones nan te pèdi 600 pwen; epi mache a te vin ouvè avèk yon bès mil 300 pwen. Answit, aprè tranzaksyon yo te rekòmanse, Lachin te vin anonse done ekonomik ki te la depi mwa pase a e ki montre yon ogmantasyon 6,5% nan enflasyon an. Tou sa se movèz nouvèl mache a pa vle tande ni li pa bezwen non plis. »

Lendi 8 out la, nan Wall Street endis ki mezire aktivite machedlabous la –S&P 500- te anrejistre yon bès preske 7%, tandiske sou mache ewopeyen an endis prensipal yo te sibi yon bès ant 3% ak 5%. Pou kounyela a, merit Lèzetazini sou mache dèt la ki te AAA bese nan nivo AA+ -swa 2èm nivo ki pi wo a, daprè klasman konpayi Standards and Poor te anonse vandredi pase a.

Prezidan Barack Obama reyaji sou klasman sa a lendi:

“Pral toujou genyen faktè ekonomik nou p ap ka kontwole : tranblemanntè, wòs nan pri petwòl la, ralantisman ekonomi an lòt kote nan lemond. Sepandan, se nou ki pou konnen kijan nou pral reyaji devan tès sa yo. Mache yo pral monte, mache yo pral desann; men yo rele nou “Lèzetazini d’Amerik”. Kèlkeswa sa yon konpayi kapab di, nòt kredi nou merite ap toujou rete 10 sou 10.

Kèk konseye La Mezon pale pou yo di konpayi Standards and Poor te sèvi ak move chif, ak done ki gen erè ladan yo, pou l te pran desizyon an. Malgre degradasyon merit kredi gouvènman ameriken an, envestisè yo kontinye achte bon Leta federal Lèzetazini an kote y ap chache yon sekirite yo jwenn nan dèt gouvènman ameriken an, menm lè sitiyasyon an pa estab sou mache yo.

XS
SM
MD
LG