Ozetazini, prezidan eli ameriken an, Donald J. Trump, sanble ap fè back sou kèk nan tèm li te devlope pandan kanpay elektoral la -pami tèm ki te toujou nan bouch li, gen pwomès li te fè pou l te mete rival demokrat li a, Hillary Clinton, nan prizon si l te ranpòte eleksyon prezidansyèl la. Misye Trump te gen, nan jounen madi 22 novanm nan, yon rankont ak laprès -sitou kèk redaktè jounal New York Times- kote li abòde dosye a. (New York Times se yon jounal prezidan-eli a te kritike seryezman pou repòtaj li yo pandan kapay la; men kounyela a li di li respekte jounal sa a e li li li regilyèman).
Nan rankont prezidan-eli a ak jounalis yo, li kite moun konprann li pa gen okenn entansyon mande lajistis re-louvri yon ankèt sou fason Madanm Clinton te itilize yon sistèm kominikasyon elektwonik prive pou l te trete dosye ofisyèl gouvènman ameriken an lè ansyen kandida demokrat la te nan tèt diplomasi Lèzetazini; se konsa tou Misye Trump fè konnen li pa enterese ankò pou l mande otorite yo louvri je sou operasyon Fondasyon Clinton te mennen pandan dè zane. Prezidan eli a deklare :
“Mwen pa vle fè fanmi Clinton nan mal. Franchman mwen pa vle fè sa. Madanm Clinton travèse anpil moman difisil nan divès fason; pa egzanp, kanpay la te di e pafwa gen aksyon mechan tou lè 2 kan yo te poze...."
Pou fini, Misye Trump di li pa tèlman gen enpresyon yon ankèt sou Madanm Clinton tap debouche sou anyen ki vo lapèn pou moun konnen.
------------------------------
TRANZISYON GOUVENNMAN AN
Yon lòt kote, pou sa k konsène fason tranzisyon gouvènman an ap mache Ozetazini, nouvèl yo fè konnen Gouvènè Eta Kawolin di Sid la, Nikki Haley, byen plase pou l tounen pwochen anbasadris Lèzetazini nan Oganizasyon Nasyon Zini --yon nominasyon ki kapab fèt depi nan jounen mèkredi 23 novanm nan.
Madanm Haley --ki gen 44 tran-- se pitit-fi imigran ki sòti nan peyi Lend e li rive sou 2èm manda li kòm gouvènè Kawolin di Sid. Men, li pa genyen okenn eksperyans nan domèn diplomasi a -kidonk, domèn relasyon entènasyonal la. Si nominasyon n nan konfime, li tap tounen premye manm nouvo kabinè ministeryèl ameriken an ki pa yon gason blan.