Accessibility links

Eliminasyon Pwogram DACA a Kapab Koute Antrepriz Amerikèn yo Plizyè Milya Dola

  • Ekip Sèvis Kreyòl VOA

Carlos Esteban, 31 nan ki soti nan Woodbridge eta Virjini se yon edityan lekòl enfimyè e yon benefisyè pwogram DACA a, Deferred Action for Childhood Arrivals, li tap patisipe nan rali pou mande Prezidan Trump pa elimine pwogram sa a predesesè li, Prezidan Barack Obama, te kreye pou ti moun ki te antre Ozetazini san dokiman legal yo. Rali sa a te fèt devan Mezon Blanch nan Washington 5 septanm 2017.

Prezidan ameriken an, Donald Trump, pwomèt pou l pase an revi desizyon govènnman li a pran pou l elimine yon pwogram ki pwoteje kont depòtasyon yon afè de 800 mil jenn imigran ki te vini Ozetazini ilegalman ak paran yo lè yo te tou piti.

Madi 5 septanm 2017 la, administrasyon Trump la te fè konnen li bay Kongrè a 6 mwa pou l aji si l vle pèmèt jenn imigran sa yo rete Ozetazini plizyè ane aprè paran yo te antre nan peyi a ilegalman avèk yo.

Ozetazini, gouvènman Prezidan Donald Trump la kòmanse madi 5 septanm 2017 la demach pou l mete fen nan yon pwogram ki pwoteje kont depòtasyon yon afè de 800 mil jenn imigran san papye ke paran yo te mennen Ozetazini pandan yo te tou piti; men administrasyon an bay Kongrè a 6 mwa pou l pase a laksyon si li vle pèmèt jenn imigran sa yo rete nan Ozetazini plizyè ane aprè paran yo te antre nan peyi a ilegalman avèk yo.

Aprè Prezidan Trump te fin anonse desizyon an, li te voye Minis Jistis la, Jeff Sessions, pale ak laprès madi 5 septanm 2017 la pou l anonse chanjman li vle fè nan pwogram sa a ki pwovoke gwo pale-anpil. Misye Sessons di:

“Se nou vle poze yon aksyon ki gen konpasyon, se pou n mete fen nan ilegalite, se pou nou aplike lwa nou yo. Si kongrè a vle pote chanjman nan lwa sa yo, se pou l fè sa dapre mekanism fondatè nasyon an te mete an plas.”

Depatman Sekirite Enteryè Lèzetazini an.
Depatman Sekirite Enteryè Lèzetazini an.

Sou menm dosye a, yon nòt pou laprès ki sòti nan Depatman Sekirite Enteryè Lèzetazini an fè konnen depatman sa a kòmanse nan lòd yon pwosesis pou l elimine aplikasyon pwogram ansyen Prezidan Barack Obama te kreye e ki rele an abreje anglè DACA, swa pwogram ki pwoteje jenn imigran yo kont depòtasyon an. Minis Sekirite Enteryè pwovizwa a, Elaine Duke, deklare:

"Desizyon gouvènman an pran pou l elimine pwogram DACA a, se pa yon desizyon li pran a la lejè. Depatman Lajistis te pran anpil swen pou l evalye konstitisyonalite pwogram sa a; e finalman li fin pa wè se yon pwogram ki an dezakò ak lwa imigrasyon ki an vigè nan peyi nou an."

Minis Duke ajoute :

“Kòm konsekans aksyon an jistis ki te fèt sa pa gen lontan, nou genyen 2 opsyon devan nou :

1.- Se oubyen nou elimine pwogram nan e fè sa nan lòd ak disiplin yon fason pou nou pwoteje benefisyè yo a kou-tèm pandan nap travay ak kongrè a pou l pase yon lwa sou kesyon an;

2.- Oubyen nou kite pouvwa jidisyè a elimine pwogram nan totalman e imedyatman. Nou chwazi opsyon ki ka koze mwens pwoblèm nan."

Sepandan analis politik yo prevwa si pwogram sa a elimine li pral koute antrpriz ameriken plizyè milya dola paske anpil nan anplwaye yo se moun kap benefisye pwogram nan.

XS
SM
MD
LG