Accessibility links

Breaking News

Kowoperasyon ant OMS ak Lachin pou Konbat Maladi Kowonaviris la nan Peyi sa a


Nan pwovens Hubei, nan Lachin, yon pwofesyonèl lasante mete rad pwoteksyon sou li pandan l ap analize dosye yon malad nan Lopital Jinyintan nan vil Wuhan. (Foto: China Daily via REUTERS, 14 fevriye 2020).

Oganizasyon Mondyal Lasante (OMS) di li gen kè-sote akoz ogmantasyon kantite pwofesyonèl lasante k ap trape viris mòtèl ki rele kowonaviris la e ki pote non COVID19. OMS fè konnen kanite ka yo anrejistre nan Lachin depase 63 mil kounyela a; plis pase yon ka chif sa a se moun ki enfekte nan pwovens Hubei kote sant epidemi an chita. Kantite moun maladi a touye monte rive mil 381 -pami yo gen 100 yo fèk rapòte.

Pandan kantite enfeksyon yo ak ka lanmò yo ap monte nan Lachin, pou kounyela a maladi a sanble li stabilize li o-nivo mondyal. Dènye estimasyon yo pale de 505 ka nan 24 peyi – pami yo gen 2 ka lanmò, youn nan Filipin e lòt la nan Japon. Daprè nouvo chif otorite chinwa yo pibliye, pase mil 700 pwofesyonèl lasante trape viris la tandiske 6 lòt mouri. Direktè jeneral OMS la, Ghebreyesus, di nouvèl sa a se yon enfòmasyon ki trè enpòtan. Se sa ki eksplike deklarasyon sa a:

Tedros Adhanom Ghebreyesus, direktè jeneral OMS. (Foto: REUTERS/Denis Balibouse, 11 fevriye 2020).
Tedros Adhanom Ghebreyesus, direktè jeneral OMS. (Foto: REUTERS/Denis Balibouse, 11 fevriye 2020).

<< Pwofesyonèl lasante yo reprezante lakòl ki kole ansanm sistèm sante a ak repons n ap bay epidemi an. Sepandan, nou dwe genyen plis enfòmasyon sou nouvo chif yo –sa vle di, antwòt, sou moman yo detekte viris la lakay travayè lasante yo epi nan ki sikonstans yo tonbe malad. >>

Oganizasyon Mondyal Lasante fè konnen yon misyon melanje OMS-Lachin ap travay sou epidemi an; nan kad kowoperasyon sa a yon ekip 12 ekspè entènasyonal ak pwofesyonè OMS pral rive nan Lachin nan 2 zou 3 jou k ap vini la yo. Manm ekip sa a pral mete ansanm avèk yon menm kantite pwofesyonèl chinwa pou yo fè rankont fòmasyon ak evalyasyon sou maladi chaje mistè sa a. Otorite yo nan OMS fini pa di 2 ekip yo pral santre atansyon yo sou efò pou yo pi byen konprann tranmisyon viris la e sou rezon ki fè li se yon maladi ki danjre.

XS
SM
MD
LG