Prezidan Etazuni Joe Biden anonse Lendi yon seri angajman ki anvizaje redui rechofman klimatik la. Li pran angajman sa yo pandan konferans Nasyonzuni sou Chanjman Klimtik la, COP26 kap dewoule nan vil Glasgow nan peyi Ekos.
"Lezetazuni pral respekte objektif anbisye sa a ke mwen fikse nan rankont o somè lidè yo te fè nan mwad Avril la. Nou pral redui gaz efè de sèr yo de ant 50 ak 52 pousan pou fè yo desann pi ba pase sa yo te ye an 2005. Nap fè sa disi ane 2030," Prezidan Biden deklare.
"Nou pral montre le mond ke Lèzetazuni non sèlman tounen bo tab la men m'espere nap jwe yon wol lidè ak bèl egzanp n ap trase pou lot peyi. Mwen konnen se pa konsa bagay yo te ye anvan, e se poutèt sa administrasyon mwen an ap travay san rete pou montre tout moun angajman nou pran vizavi chanjman klimatik se pa selman pawol yo ye men aksyon," Biden ajoute.
Pami nouvo objektif sa a gen yon nouvo seri angajman ki etann ako Ameriken te siyen anvan yo. Genyen ladann, yon plan $3 milya pou Plan Dijans Prezidan an pou Adaptasyon ak Reziyans pou mete moun o kouran sityasyon chanjman klimatik la, finansman ak adaptasyon, epi plizyè lwa Ameriken ki vize kore enfrastrikti peyi a pandan ke lap redui an menm tan, nivo polisyon an.
Kongrè Ameriken an ap fè deba sou pwojè lwa sa yo depi plizyè mwa deja -- sepandan yo pat rive antann yo ase pou vote sou li anvan prezidan an te vwayaje pou al nan rankont COP26 la semèn pase a.
Korespondan VOA nan Lamezonblanch, Patsy Widakuswara kap vwayaje ak Prezidan Biden, epi Anita Powell ekri vesyon orijinal nouvel sa a