Ann Ayiti otorite wo plase nan Polis Nasyonal la di yo deja pran tout dispozisyon pou yo anpeche zak kraze-brize ki ta ka dewoule nan peyi a -sitou nan kapital la, Potoprens- pandan jounen mekredi 17 Oktòb la nan okazyon manifestasyon plizyè gwoup sitwayen anonse nan kad mouvman "Defi PetroCaribe a" kote yo vle fè vwa yo sonnen byen fò pou make anivèsè lanmò fondatè nasyon an, Jean-Jacques Dessalines. Michel-Ange Gédéon, chèf Polis Nasyonal la, fè tande vwa l nan yon anons-avètisman ou ka tcheke pi ba a.
Nan jounen madi 16 oktòb la, swa yon jou avan komemorasyon lanmò Pè Fondatè peyi a, Jean Jacques Dessalines, plizyè sitwayen leve-kanpe nan kèk zòn nan Pòtoprens pou yo kontinye mande otorite yo fè limyè sou itilizasyon "Lajan PetroCaribe a".
Mouvman pwotestasyon sa a te paralize anpil katye nan kapital la --pami yo genyen Lalue, Magloire Amboise ak Avni Christophe. Non mouvman an se: “Veye PetroCaribe”. Klike sou lyen anlè a pou w tande kèk nan moun ki t ap pwoteste yo.