Accessibility links

Ayiti: Militan Dwazimen Jean-Claude Bajeux Mouri Vandredi 5 Out la nan Pòtoprens

  • Jean-Baptiste Jacques

Pwofesè e doktè Jean-Claude Bajeux, direktè egzekitif Sant Ekimenik Dwa Zimen an, mouri vandredi nan peyi Dayiti, dapre yon anons fanmi li pibliye 5 out pase a nan kapital la, Pòtoprens.
Nouvèl sa a se yon kou siprann pou tout moun— tan pou sila ki te travay e lite bò kote l nan batay pou respè dwa moun ak demokrasi ann Ayiti, ke pou sitwayen san vwa e san defans devan zak kraze zo rejim bout di yo.

Misye Bajeux te dirije pandan preske 30 tan Sant Ekimenik Dwazimen an---yon enstitisyon ki pa janm ezite pou leve vwa chak fwa gen zak enjistis ak zak abitrè kont konpatiryòt li yo... kit se ann Ayiti ou nan Repiblik Dominikèn.

Pwofesè Bajeux te genyen yon doktora nan lang Romàn ak literati li pran (1977) nan Princton University. Li te anseye literati Karayib nan Inivèsite Pòtoriko e li pibliye yon Antoloji Literati Ayisyèn.

Lanmò li se yon gwo pèt pou Demokrasi, yon gwo pèt pou Dwazimen. Jean Claude Bajeux, se te yon gwo demokrat, yon gwo imanis, yon gwo patriyòt, yon potorik ayisyen. Li kite yon vid ki pral difisil pou zòt konble. Misye Bajeux te gen 79 van.

NB: Fè yon klik sou ikòn mp3 ki anwo, adwat paj wèb la pou repòtaj Clarens Renois sou lanmò militan Jean-Claude Bajeux. Repòtaj la pote dat 5 out 2011.

XS
SM
MD
LG