Accessibility links

Breaking News

Ayiti: Konsèy Elektoral la di eleksyon jeneral yo byen dewoule


Daprè nouvèl ki sòti Pòtoprens, nan yon konferans-pou-laprès otorite Konsèy Elektoral Pwovizwa a bay nan fen jounen an, yo fè konnen operasyon elektoral la dewoule nòmalman e eleksyon an se yon siksè. Men deklarasyon Prezidan KEP a, Gaillot Dorsinvil, fè nan rankont sa a avèk laprès:

“Se yon jounen elektoral konplè e reyisi. KEP a anile eleksyon nan 56 sant-vòt sou yon total mil 500 sant-vòt;-- 3, 56 % sant-vòt te afekte ak pwoblèm ki te asosye ak dewoulman operasyon elektoral la… Lapolis rapòte lanmò yon moun ki viktim nan konfwontasyon ki te gen rapò ak eleksyon yo. KEP a remèsye tout sitwayèn, tout sitwayen ki te fè deplasman jounen 28 novanm nan pou yo fè devwa sivik yo.”

Malgre deklarasyon ofisyèl Konsèy Elektoral Pwovizwa a, analis ki pale sou VOA rekonèt yon sitiyasyon politik difisil ap devlope nan peyi Dayiti, kote jiska 14 nan 18 kandida a la prezidans yo te deside, byen bonè nan jounen dimanch la, kite kous la devan sa yo konsidere kòm magouy pouvwa an plas la ta fè pou l trike rezilta eleksyon yo. Kandida sa yo mande anilasyon vòt la.

2èm otorite nan Oganizasyon Eta Ameriken yo, (OEA), anbasadè Albert Ramdin --ki prezan ann Ayiti nan okazyon eleksyon-an-- deklare OEA pa ka pran pozisyon sou apèl divès kandida lanse pou yo mande anilasyon eleksyon an. Misye Randim pale ak Sèvis Kreyòl VOA pou l di eleksyon yo dewoule anba otorite yon enstitisyon peyi Dayiti; òganizasyon rejyonal la pa gen okenn dwa pou l mele nan kesyon an. Sepandan, diplomat la anonse OEA va genyen pou l bay opinyon n sou dewoulman vòt la lè moman an va rive.

XS
SM
MD
LG