Accessibility links

Ayiti-Politik: Nouvo KEP a Pwomèt yon Travay Transparan e Demokratik

  • Ekip Sèvis Kreyòl VOA

Nan peyi d Ayiti, manm yon nouvo Konsèy Elektoral Pwovizwa prete sèman nan jounen mèkredi 30 mas 2016 la nan Pòtoprens. Prezidan KEP a, Leopold Berlanger, rekònèt difikilte misyon an; men nan non kòlèg li yo li pwomèt nouvo konsèy la pral pran travay li o serye, pou yon misyon kap akonpli nan transparans ak respè dispozisyon lalwa yo. Men fòmasyon biwo KEP a:

-Léopold Berlanger, Prezidan;

-Carlos Hercule, Vis-Prezidan

-Marie Frantz Joachim, Sekretè Jeneral;

-Frinel Joseph, Trezorye.

Nouvo minis anviwonnman ayisyen an, ansyen Senatè Dieuseul Simon Desra, se youn nan pèsonalite ki te asiste seremoni prestasyon sèman nouvo konseye elektoral yo. Li te pran lapawol pou l raple manm KEP a yon fè konstitisyonèl: sè ke, depi yo fin prete sèman, yo pap travay pou sektè yo reprezante nan konsèy la; men yap travay pou nasyon an, se pèp la ki patwon yo.

Bò kote pa l, Senatè Francisco de la Cruz (Plato Santral) di li akeyi ak satisfaksyon kreyasyon nouvo Konsèy Elektoral Pwovizwa a. Sepandan li eksprime espwa Pouvwa Egzekitif la pa pral eseye mete yon kontwòl total sou manm KEP sa a, jan sa te fèt nan le pase.

Anfen, nouvo pòtpawòl prezidans la, Serge Simon, repete yon deklarasyon Prezidan Jocelerme Privert te fè imedyatman aprè li te monte sou pouvwa a: kès Leta vid. Se yon fason pou Misye Simon repete tou pawòl kòmkwa administrasyon ki te la anvan an te mal jere fon piblik yo.

XS
SM
MD
LG