Accessibility links

Breaking News

Ayiti Eleksyon: Reyinyon Sou Finansman Vòt Mwa Novanm Nan


Gouvènman ayisyen an, Konsèy Elektoral Pwovizwa a ak reprezantan kominote entènasyonal la siyen mèkredi 4 out la yon akò sou finansman eleksyon ki fiske pou dewoule nan mwa novanm 2010 la.

Toujou konsènan eleksyon yo, ko lidè kowalisyon Altènativ, mèt Victor Benoit, akize KEP a deske li vyole konstitisyon an paske li pèmèt kèk kandida ki se ansyen jesyonè lajan Leta, poze kandidati yo san yo pa resevwa dechaj konplè nan men Kou dè Kont.

Nan Gonayiv, asosyasyon fanm ki rele SOFAGO (Solidarite Fanm Gonayiv) mete ansanm avèk HANA (Asosyasyon Enfimyè Ayisyano-Amerikèn) pou yo pote swen medikal gratis bay popilasyon lokal la.

Nan Jeremi, pèp la pwoteste pou l denonse sitiyasyon malouk plizyè ri nan vil la.

Sou Il Lagonav, pandan egzamen ofisyèl sizyèm ane fondamantal ap dewoule, gen paran k ap plenyen pou tèt pitit yo pa patisipe nan konpozisyon yo paske responsab Depatman Edikasyon Nasyonal pa remèt yo fich yo a tan.

Nan Plato Santral la, pi presizeman nan komin Cerca La Source, anpil sitwayen ap plenyen akoz difikilte y ap konfwonte lè yo bezwen fè yon kat didantite. Youn nan rezon yo, sè ke li difisil pou yo jwenn ak de nesans yo lakay ofysye eta sivil la.

Nan vil O Kay, yon grèv manm pèsonèl lopital la ap fè genyen move konsekans pou malad yo ak manm fanmi yo. Anplwaye yo, k ap reklame pèman 10 mwa salè Leta dwe yo avèk pi bon kondisyon travay, rive menm fèmen pòt lopital la.

Korespondan nou yo atravè Ayiti devlope nouvèl sa yo pou nou.

Klike sou ikòn MP3 ki anwo e adwat atik sa a pou w koute repòtaj VOA kreyòl pou jounen 5 out 2010 la

XS
SM
MD
LG