Accessibility links

Ayiti-Eleksyon : Nouvo Devlopman sou Kreyasyon Komisyon Evalyasyon Elektoral Endepandan an


Ann Ayiti, biwo kominikasyon prezidans la fè konnen yon komite gouvènman Privert/Jean-Charles la te fòme sa pa gen lontan, remèt rekòmandasyon li konsènan tèm-de-referans yon komisyon evalyasyon elektoral endepandan pou verifye rezilta eleksyon ki te fèt nan lane 2015 yo. Daprè yon nòt-pou-laprès biwo a fè parèt, gouvènman an repete objektif travay komisyon sa a, se tabli konfyans nan entegrite rezilta eleksyon yo epi fè moun kwè nan senserite pwosesis elektoral la. Ansyen Senatè Jean Hector Anacasis, responsab pati LAPEH ki reyaji sou nouvo devlopman sa a nan politik peyi a, di li byen akeyi komisyon evalyasyon an –“ke LAPEH te reklame dayè”- e li fè konnen kandida pati a, Jude Célestin, pare pou l ale nan eleksyon avèk nenpòt ki lòt kandida.

Ansyen Premye Minis ayisyen Garry Conille
Ansyen Premye Minis ayisyen Garry Conille

Ansyen Premye Minis ayisyen Garry Conille rankontre nan jounen jedi 14 avril la avek komisyon etik ak anti-koripsyon sena a pou l te reponn kesyon sou fason li te jere lajan Petro Caribe a. Kòm yon egzanp sou jan bagay yo te fèt sou administrasyon li a, Dr. Conille di li te mande revizyon alokasyon lajan pou 3 konpayi dominiken; sepandan, san revizyon sa a, kontra yo te ale jwenn konpayi yo kanmèm. Prezidan komisyon an, Senatè Youri Latortue, ki konfime repò ansyen chef gouvènman an, atire atansyon sou mank disiplin, transparans ak sans responsablite (responsabilisation) nan fason lajan Leta te depanse sou gouvènman ayisyen yo nan ane ki pase yo.

Prezidan Komisyon Sante nan chanm bas palman ayisyen an, Depite Sinal Bertrand, te rankontre ak Minis Sante piblik ak polilasyon an, Dr. Daphnée Benoit Delsoin, nan jounen jedi 14 avril la pou yo te fè deba sou mwayen pou amelyore sèvis sante nan peyi a. Misye Bertrand ak Doktè Benoit Delsoin fè konnen rankont la te chita sitou sou fason pou yo mete fen nan yon grèv pèsonèl medikal la ap fè nan pi gwo enstitisyon sante peyi a, Lopital Jeneral Pòtoprens la.

Gwoup Croissance S.A. --yon gwoup kap reflechi sou sitiyasyon ekonomik peyi d Ayiti-- prezante yon rapò jedi sou eta ekonomi ak finans peyi a. Daprè PDG gwoup la, Kesnel Farel, rapò a baze sou yon etid Fowòm Ekonomik Mondyal la.

XS
SM
MD
LG