Accessibility links

Breaking News

Foutbòl Ak Ekonomi


Apre li envesti plis pase 4 milya dola nan preparasyon mondyal ane 2010 la, Afrik Di Sid espere youn nan konsekans pozitif koup di mond la se ogmantasyon pwodui nasyonal bri li ou PNB.

Afrik di Sid envesti 4 milya 300 milyon dola nan mondyal ane sa a. Se lajan ki envesti nan konstriksyon ak reparasyon estad, amelyorasyon kondisyon ayewopò yo, plis reparasyon kèk wout ak otowout ki fè pati rezo kominikasyon terès nasyonal la. Daprè sa gouvènman sid-afriken an di, plis pase 450 mil touris ap vizite peyi a anvan koup la fini. Otorite yo espere anpil nan etranje sa yo va pwofite pou y al vizite sit touristik e istorik yo, e konsa yo va pote kontribisyon yo nan efò kap fèt pou ogmante kantite lajan peyi a fè nan tourism.

Enfòmasyon ki sòti bò kote gouvènman an toujou, fè konnen kreyasyon plis pase 130 mil dyòb sèvi pou ankouraje ekonomi enfòmèl la avèk aktivite ki diminye to chomaj la nan yon peyi kote sou chak goup 4 moun, genyen youn ki pap travay. Moun sa yo espere y ap jwenn chans pou yo gen yon lavi miyò avèk Koup di Mond foutbòl la.

Anvwaye espesyal Lavwadlamerik nan Afrik di Sid, Iscar Blanco, te pale pa egzanp avèk yon chofè taksi ki rele Jacky Sinier. Misye Sinier fè konnen Koup di Mond la ba li okazyon pou l fè plis lajan ke sa l tap fè anvan mondyal la. Chofè a pale pou l di --nap site : « Anvan Koup di Mond la, mwen tap travay nan yon mache ; jounen jodi a, e jiskaske mondyal la va fini, se taksi m pral fè avèk machin sa a.»

Evenman spòtif la vin non sèlman bay endistri otelye ak sèvis restorasyon yo, n ap pale restoran yo, yon gwo bourad, men tou li ede anpil-anpil lavant pwodui tankou mayo ekip yo, drapo peyi ki prezan nan mondyal la avèk tout sa ki kapab sèvi kòm souvni. Yon vandè ki rele Joseph e ki pale ak Iscar Blanco sou yon plas piblik nan vil Johannesbourg, fè konnen –nap site misye : «Se chak jou mwen vann vouzela m yo, mayo m yo, estati lyon ak jiraf moun ta byen rennmen pote tounen lakay yo. Jodi a mwen mwen fè plis lavant lontan pase anvan mondyal la.»

Manm Komite Òganizatè Sid-Afriken an di, daprè kalkil ki fèt, youn nan efè pozitif Koup di Mond kap dewoule nan peyi yo a, se yon ogmantasyon 1 pou san PNB a. Biwo Trezò Piblik la --ki pibliye chif sa a—baze kalkil li a sou depans touris yo ap fè nan otèl, restoran yo ajk nan sèvis transpò piblik la.

XS
SM
MD
LG