Accessibility links

Rezilta Nevyèm Jounen Koup Dimond Foutbòl La

  • Serge Michel

Seleksyon foutbòl Oland la kalifye pou 2zyèm faz koup dimond lan gras ak yon kal 1-0 li bay Japon e gras ak viktwa 2-1 Dànmark ranpòte sou lyon endontab kamewonè yo.

Oland kounye a premye nan Gwoup E a ak 6 pwen apre 2zyèm viktwa li ranpòte nan mondyal 2010 la. Wesley Sneider te make gòl Oland la nan 53zyèm minit. Apre Japon te fin pran gòl sa a, defans solid Japon an te koule beton devan kan li pou jouk match la fini; kidonk Olandè yo pa t ka "ogmante skò a" ankò. Japon vini an 2zyèm pozisyon avèk 3 pwen, pandan Kamewoun ak Dànmak pa gen okenn pwen yo menm apre defèt yo te sibi nan kòmansman konpetisyon an.

Nan match jodi a, Kamewounè yo bat ba devan Danwa yo ki kale afriken yo 2-1.

Nan lòt aksyon, ekip Ghana a, ki rele Black Stars, fè match nil ak Ostrali 1-1 nan Gwoup D a nan Rustenberg.

Yon lòt kote, federasyon foutbòl mondyal la FIFA pwomèt pou l ranfòse sekirite nan estad yo apre yon fanatik te antre nan vestyè ekip Angletè apre match Angletè/Aljeri.

FIFA fè konnen yo te kondi misye mete deyò tousuit, men yo te lage l olye yo te remèt li bay lapolis.

Pòtpawòl FIFA a, Nicolas Maingot, fè konnen y ap ranfòse sekirite pou yon ensidan konsa pa janm rive ankò.

Lapolis Afrik di Sid fè konnen l ap chache fanatik la pou li trennen l devan lajistis pou vyolasyon sa a.

Toujou nan Koup dimond foutbòl la, responsab federasyon foutbòl fransè a mete deyò jwè fransè Nicolas Anelka apre li te joure antrenè seleksyon nasyonal franse a, Raymond Domenech, pandan yon diskisyon ki gen pou wè match kote Lafrans te pèdi 2-0 devan Meksik la.

Federasyon Foutbòl fransè a fè konnen prezidan li, Jean-Pierre Escalettes, Domenech ak delegasyon fransè a nan Afrik di Sid, te pran desizyon an apre Anelka refize prezante ekskiz piblik.

XS
SM
MD
LG