Accessibility links

Breaking News

Ann Ayiti, Gang yo "Tou-Pwisan", Pou Jounalis Sa a ki Sove Anba yon Atak Mòtèl.


Lapolis fe patwouy apre yo finn rekipere kadav jounalis ki mouri anba bal Potoprens, Vandredi 7 Janvye 2022.

"Bal t ap chante": se pawòl sèl moun ki resi chape nan atak kote 2 jounalis ayisyen pèdi lavi yo anba men yon gang nan alatou Potoprens. Wilmann Vil fèmen kò l yon kote, paske li pè pou l pa tonbe ankò anba men rezo bann kriminèl ke moun pa menm konnen ke yo ekziste.

Wilmann Vil, ki te ak Wilguens Louissaint ak John Wesley, t ap vanse sou wout kote yo ta pwal fè yon repòtaj. Yo t ap travèse a pye yon larivyè ki seche nan kè yon mòn ki domine kapital la. San okenn pwoteksyon, yo te anba atak youn nan gang ki vle pran kontwòl zòn riral la, ki tounen yon pwen estratejik pou yo ka rive nan mwatye sid Ayiti a.

"Bal t ap vide, yo t ap tire san rete," se sa Wilmann Vil te sonje lè li t ap pale nan telefòn ak Ajans Frans Presse. Repòtè a ki gen 31 lane te rive jwenn pwoteksyon anba pye-bwa ki arebò ravin nan e, li te moute yon pant mòn kote peyizan te ba l pwoteksyon lè li te eksplike yo nan ki sityasyon li ye.

- Bal t ap chante -

"Yo fè m chita e mwen pran telefòn mwen pou rele Amady." Yo travay ansanm depi yon dizèn lane. "Mwen mande l kote li ye, e li reponn 'nèg yo pran m'", se sa travayè medya an liy RL Pwodiksyon an rapòte.

Epi Wilmann Vil tande kòlèg li a k ap soupriye manm gang yo pou epaye li-menm ak Wilguens Louissaint. "Amady t ap di yo 'se pa bandi nou ye, se jounalis nou ye. Nou vin fè yon repòtaj,'" se sa Wilmann sonje. Lè sa a, li te mete telefòn li sou opalè "pou tout peyizan ki te antoure l te ka tande."

Men moun te ka tande nan telefòn nan bri bal ki t ap chante e jounalis la te reyalize ke li te dwe jete l touswit.

"Moun yo nan zòn nan te ban m rad pou m ka chanje sa ki te sou mwen e pase san yo pa rekonèt mwen," se pawòl jounalis la ki rakonte ke moun nan zòn nan te mete l nan yon ti bitasyon.

Wilmann te pale vit pou l di, "Pandan mwen te sou wout la, mwen te wè nèg ame sou do kay ki t ap chache m."

Kiltivatè yo te konnen ki valè danje ki genyen nan pwoteje yon moun ke gang ap chache, konsa yo te fè l pran yon taxi-moto ansanm ak yon otorite eli nan zòn nan. Se konsa Wilmann Vil te kite zòn nan, men sa pa vle di li pa gen lapè kounye a. Pitit fi li ki gen 4 lane, li menm tou di li gen laperèz e ke li paka dòmi.

XS
SM
MD
LG