Minis Finans Unyon Euwòp la Mete yo Dakò Sou Yon Plan Estabilizasyon Pou Euwo a

Minis finnans peyi-manm Unyon Ewòp-la mete yo dakò pou yo mete sou pye, an kowoperasyon ak Fon Monetè Entènasyonal, yon plan estabilizasyon pou deviz kontinantal-la, “Euro”-a, -- yon plan ki monte rive prèske yon trilyon dola ameriken (swa 750 milya euro). Pandan tout dimanch-la nan vil Brusèl, an Bèljik, minis finans-yo òganize yon seri de rankont-maraton pou yo te kapab rive jwenn akò sa-a anvan gwo mache azyatik-yo te ouvè pou tranzaksyon Jodi lendi-a.
<!-- IMAGE -->

Byen bonè maten-an, komisè ekonomik Union Ewòp-la, Olli Rehn, bay yon konferans-pou-laprès kote li rekonèt pwoblèm ki poze pou peyi ki sèvi ak lajan “euro”-a.

“Sitiyasyon sa-a te toujou reprezante yon defi sistematik pou estabilite finansye nan rejyon kote yo utilize euro-a," Misye Rehn deklare. "Se pa yon atak sou yon eta-manm an patikulye, se yon menas pou estabilite finansye rejyon-an e pou Unyon Ewòp-la.

Plan estabilizasyon pou “Euro”-a mache ak yon konbinezyon ki gen ladan n prè bilateral ak garanti pou prè sa-yo.

Objektif-la se anpeche kriz dèt peyi Lagrès-la pwovoke yon tanpèt finansye nan peyi kap konfwonte pwoblèm ekonomik e ki sèvi ak « euro »-a kòm lajan.

Pi fò nan lajan-an (swa preske yon trilyon dola), se va kontribusyon Unyon Ewòp-la, tandiske rès-la ap sòti nan Fon Monetè Entènasyonal.