Accessibility links

Bal ki Vize yon Machin nan Ti Ayiti Touye yon Ti Fi 7 an



Nan Miami, yon jèn ti fi 7 an yo rele Jania pèdi lavi li Vandredi swa nan Ti Ayiti andedan yon machin pandan yo tapral achte yon manje nan zon 64èm ru an. Yon machin ki tap pase bo kote yo te krible machin pa Jania a ak bal. Jania mouri sou le chan, yon lot moun ki te sou volan an resevwa yon bal dèyè kou -- li gen 25 an men lapolis poko rann non an publik.

Daprè lapolis nan Miami, enfomasyon yo genyen fè konnen ke machin nan te yon sib men pa ti pitit ki mouri andedan machin nan.

Manman an ki te nan machin nan te pran rele e te mande sekou -- ki pat pran tan pou te rive. Daprè lapolis, madanm sa a ki te pran bal la, se yon zanmi manman Jania. Li pran bal dèyè kou.

Majistra Thomas Regalado te vizite manman ti pitit la Samdi maten pou prezante'l kondoleyans li. Jania te lekol pa two lwen kote li te mouri an, nan katye yo rele Miami Shores.

Distri lekol nan konte Miami-Dade la pral bay asistans psikolojik a lot timoun ki te konnen Jania nan lekol elemantè li te ye a, paske lanmo sa a li te brital e li touche timoun yo anpil.

Ti pitit ki mouri a te nan yon machin Chevy Impala avèk manman li e 2 lot moun, pami yo: yon ti sè'l ki gen 3 zan.

Lapolis deklare pou kounyea yap chache yon sèten Israel Jean -- alyas "Zako" ke yo konsidere tankou yon moun ki ka util yo, ki ka konnen kèk bagay sou krim sa a men yo pa konsidere'l tankou yon sispèk. Men yo fè konnen li gen koneksyon nan zon nan e yo kwè li ka genyen bon enfomasyon ki ka ede lapolis.

Lapolis nan Ti Ayiti te fè pase foto li e yo fè konnen ke "Zako" gen yon istwa kriminèl. Li atake moun deja, li volè ak zan nan men e yo te deja arete'l pou dwog. Pou le moman, lapolis pa di plis men yo panse ke trè byen to, yo kapab jwen moun ki fè zak la.


"Se yon 'drive-by shooting' kan yon bagay nap travay sou envestigasyon gen de enfomasyon nou bay yo pou le moman yo ka koze pwoblem, yo ka poze pwoblem pou ka ke nap travay lan," detektiv Sanz Dorsely eksplike. "Sèl bagay mwen ka pwomèt ou apati de semèn kap vini la a, lè ke'm fin chita pale ak moun kap travay nan [depatman asasina] homicide yo, map kapab gen lot enfomasyon."

XS
SM
MD
LG