Accessibility links

Sena Ameriken an Jwenn yon Antant sou Lit kont Chanjman Klimatik yo


Nan sena ameriken an, yon gwoup ki gen ladan n repibliken ak democrat, antann yo sou yon plan-kad pou yo prepare yon pwopozisyon-lwa sou chanjman klimatik yo, epi voye l bay Prezidan Barack Obama anvan li kite Washington pou l al patisipe nan Konferans Entènasyonal sou Klima a kap dewoule nan vil Kopennhag, nan Dànmak. Senatè John Kerry, yon demokrat Eta Massachusets, pale yè jedi a pou l di li menm ak kolèg ki nan gwoup la dakò pou yo pran divès lejislasyon sou kesyon an epi fè yo fè yon sèl; men se pou yo tounen yon lwa ki kapab kreye travay e bay Lèzetazini endepandans li sou plan enèjetik la. Men deklarasyon Senatè Kerry:

<<Akò-kad sa a ta dwe voye yon mesaj klè e fò bay ameriken yo… yon mesaj kap di : "Nou kapab kreye dè milyon dyòb e ranfòse ekonomi nou an, an menm tan ke nap kore sekirite nasyonal nou. Pou sa nap fikse nou yon objektif pou n redui polisyon e pran plis endepandans sou plan enèjetik la. >>

Youn nan senatè repibliken ki pote-kole ak inisyativ sa a, se Lindsey Graham (Eta Kawolin di Sid). Lè laprès mande l poukisa li se youn nan yon ti kantite repibliken ki apiye lide a, li reponn pou l di travay sou chanjman klimatik yo se pa yon travay pou repibliken sèlman oubyen pou demokrat sèlman; se yon travay ki pa dwe genn yon koulè politik.

Jdesmara@voanews.com

XS
SM
MD
LG