Accessibility links

Breaking News

Ayiti : Sòti nan Politik Rive nan Lasante, an Pasan pa Asistans Entènasyonal


Ann Ayiti, pwofesè dwa entènasyonal e lidè politik Myrlande Manigat fè konnen li gen kè-sote akoz posiblite pou twòp kandida ale dèyè plas prezidan an nan eleksyon ki gen pou dewoule ane pwochèn nan. Daprè nouvo lidè pati politik RDNP (Rasanbleman Demokrat-Nasyono Pwogresis), sa kapab divize elektora a twòp. Madan Manigat kontinye pou l di manm pati l la deja ap fè virewon atravè peyi a nan moman li se sèl lidè ki deklare kandidati li piblikman jiskaprezan. Lidè RDNP a pa kache di li pa ta sezi si kantite kandida pou prezidansyèl 2010 yo «monte rive 40, kòm dabitid.»

----------------------------------------------------------------

Gouvènman peyi Ajantin anonse li pral finanse konstriksyon yon sant akrikòl nan vil Ti Gwav pou apiye efò gouvènman ayisyen an ap fè pou l ranfòse pwodiksyon nasyonal la. Anbasadè Ajantin nan nan Pòtoprens, José Maria O'Campo, fè anons la nan wikenn nan pandan li tap fè yon visit nanTi Gwav. Daprè diplomat la, sant agrikòl la ta dwe kòmanse fonksyone anvan yon lane.

------------------------------------------------------------------

Nan Plato Santral la, Zanmi Lasante, yon ONG ki mele nan aktivite nan domèn lasante, edikasyon ak agrikilti, anonse li pral kòmanse bati anvan lontan yon konplèks medikal nan vil Mirebalais, avèk asistan gouvènman ayisyen an ki deja ofri teren pou konstriksyon an fèt. Daprè kèk sous nou kontakte, responsab yo vle pou konplèks medikal sa a ofri tout kalite sèvis yon lopital modèn kapab ofri. Majistra Mirbalais a, Lochard Laguerre --ki pale sou dosye a avèk korespondan VOA Jean Christophe Collègue-- fè konnen pwojè a déjà jwenn apwobasyon e li benefisye apui Depatman Finans avèk DGI (Direksyon Jeneral Enpo).

Pou w tande detay nouvèl sa yo, ale sou sit entènèt Sèvis Kreyòl VOA a e koute nouvèl maten jounen 19 oktòb 2009 la.

Jdesmara@voanews.com

XS
SM
MD
LG