Accessibility links

Reyaksyon Ase Pozitif Sou Diskou Prezidan Préval Devan L'Onu an


Prezidan ayisyen an, Rene Preval, eksprime enkyetid li pou jan puisans mondyal reyaji anfas kondisyon yo sou planèt la e sou pèspektiv amelyorasyon endis devlopman ekonomik yo. Lidè ayisyen an te pran lapawòl nan 64 trièm asanble jeneral Nasyonzini an, Jedi, nan Nouyòk.

Msye Preval rann puisans mondyal yo responsab modèl devlopman ak modèl gouvènans yo enpoze nasyon pòv yo depi plizyè syèk e ki pafwa, li di, pa adapte ak reyalite yo. Lidè ayisyen an pwononse li anfavè renouvèlman manda misyon estabilizasyon nasyonzini an nan peyi li, MINUSTAH, e li mande Konsèy Sekirite l'Onu an aksepte rekòmandasyon Sekretè Jeneral Nasyonzini an, Ban Ki-moon, pou misyon an rete pandan yon ane ankò ann'Ayiti

Prezidan Preval pote-kole ak lòt lidè peyi ki kondane kou deta militè Honduras la kont prezidan Manuel Zelaya e li apiye rezolisyon Konsèy Sekirite a pou rezoud kriz la.

Chèf leta Ayiti a konsidere tout kòm enjis anbago kap peze depi plis pase 40 tan sou Kiba a malgre Nasyonzini adopte plizyè rezolisyon pou mande leve anbago sa a. Se an rezime kèk nan prensipal pwen nan diskou prezidan René Préval jedi 24 septanm 2009 la nan L'Onu.

Prestasyon lidè ayisyen an resevwa kèk bon pwen nan peyi Dayiti, kote menm youn nan kritik ki konnn plis ap kritike li yo, avoka e òm politik Osner Fevry jije genyen pasaj pozitif nan diskou prezidan ayisyen an, eksepte sou kesyon renouvle manda twoup Nasyonzini yo.

Ale sou ralonj ki anwo e adwat atik sa a pou 'n koute reyaksyon mèt Févry a nan mikwo Rotchild François jr.

XS
SM
MD
LG