Accessibility links

Sena Ameriken an Ratifye Jij Sonia Sotomayor Kòm Nouvo Manm Kousiprèm Lèzetazini


Avèk yon vòt 68 vwa pou e 31 kont Chanmwot Etazini an apwouve nominasyon Jij Sotomayor--premye Jij ras ispanik ki janm syeje nan Kousiprèm nan.

Jij Sonia Sotomayor ap prete sèman samdi devan Jij John Roberts, prezidan Kou a. Madam Sotomayor se 111èm juj ki antre nan pi gwo tribinal Lèzetazini an e li se 3èm fi ki genyen onè sa a.

Nan deklarasyon li fè tousuit apre konfimasyon Sena a, prezidan Barack Obama, di li "kontan e satisfè anpil" ak desizyon Gran Kò a.

Misye Obama di: "ak vòt istorik sa a, Sena a afime Jij Sotomayor genyen entelijans, tanperaman, dosye, entegrite ak endepandans "d'esprit" pou l' syeje nan pi gwo tribinal nasyon nou an."

Demokrat yo chante lwanj pou Sotomayor (55 an) kòm yon santris modere. Men anpil repibliken vote kont li; yo deklare li "byeze" e ke l' genyen yon ajenda liberal li pral aplike nan Kousiprèm nan.

Pou vòt istorik sa a, tout senatè te dèyè biwo yo pandan sesyon an e yo te leve kanpe lè tou yo rive pou yo vote.

Sotomayor ap ranplase Jij David Souter, yon liberal yon prezidan repibliken te deziye pou Kousiprèm nan.

Sepandan, obsèvatè yo pa atann aske nouvo jij la pral chanje "klivaj" ideyolojik ki ekziste nan Asanble "9 saj la".

XS
SM
MD
LG