Accessibility links

12 Mò ak 30 Blese: Se Konsekans Zak Vyolans ki Dewoule nan Afganistan Lendi 3 Zout 2009 la


Nan Afganistan, lapolis fè konnen yon bonm ki te arebò yon wout eksploze e li touye 12 moun, tandiske gen 30 lòt konsa ki blese. Sa rive jodi lendi 3 zout la nan vil Herat, nan pati lwès peyi a. Daprè otorite yo, enkoni te mete bonm nan nan yon bwat-fatra e yo fè l eksploze pandan yon patwouy lapolis tap pase tou prè l. Yon pòt-pawòl mouvman Taiban an fè konnen atak sa a te vize chèf polis yon komin ki pa lwen ak vil Herat e misye blese lejèman. Pami moun ki mouri yo genyen 2 polisye, yon fanm ak yon ti moun piti.

Toujou nouvèl sou sitiyasyon an nan Afganistan: Semèn pase a prezidan Hamid Karzai te pwopoze pou gouvènman an fè negosyasyon lapè avèk militan Taliban yo si yo pare pou yo renonse ak zak vyolans. Nan yon konferans-pou-laprès reprezantan l’ONI nan peyi a, Kai Eide, bay sou dosye sa a, li fè konnen tout negosyasyon ta dwe gen ladan yo prensipal dirijan mouvman Taliban an. Nap site misye Eide:

"Si ou vle rezilta ki apwopriye, ou fèt pou w pale ak moun ki apwopriye yo. Si se yon pwosesis rekonsilyasyon pasyèl sèlman ou genyen, se rezilta pasyèl sèlman ou pral jwenn; si ou vle yon plan lapè global, li pa sifi pou w pale ak kòmandan ki sou teren yo sèlman. Se yon pwosesis politik ou bezwen e mwen panse ou fèt pou pran kontak ak strikti politik mouvman rebelyon an."

Se opinyon Kai Eide, reprezantan l’ONI nan Afganistan sou sitiyasyon an nan peyi sa a, kote vyolans pou rezon politik, etnik ak relijye kontinye fè plis viktim ak plis dega.

XS
SM
MD
LG