Accessibility links

Ekonomi Amerikèn nan Kontinye Fè fas ak Difikilte, Daprè Prezidan Obama.


Prezidan ameriken an, Barack Obama, fè konnen li atann ni aske bòn nouvèl ak move nouvèl a la fwa parèt sou sitiyasyon ekonomik la o Zetazini Jodi vandredi a 31 jiyè 2009 la, lè gouvènman an va pibliye chif yo sou evolisyon ekonomi an pandan 2èm. trimès ane a. Daprè previzyon misye Obama fè, chif sa yo pap pote twòp rekonfò, twòp ankourajman pou ameriken ki pèdi travay yo, oubyen pwopriyetè biznis kap fè fas ak gwo difikilte akoz resesyon an. Lidè Lèzetazini an di nouvo chif yo pral montre PNB a (pwodui nasyonal bri a) te diminye ankò pandan peryòd avril-jen 2009 la. Nap site prezidan Obama :

«Mwen prevwa chif yo pou PNB a pral montre ankò ekonomi an te ratresi pandan trimès ki pase a, e travay moun ap pèdi toujou reprezante yon gwo pwoblèm.»

Chif Depatman Komès la pibliye vandredi montre ekonomi an te ratresi mwens (1 pousan) ant mwa avril ak jen an, swa mwens ke sa ekonomis yo te atann, e pi bon lontan ke kontraksyon 6.4 percent trimès janvye/mas la.

Mr. Obama di yon lòtsiy ki bay ankourajman se envestisman sektè afè ki tap degrengole depi dè mwa e dè mwa sanble ap stabilize. "sa kapab vle di, komès yo ap repran jarèt, yo pral anrejistre kwasans e rekoumanse anplwaye moun ankò. E sa pral rive lè komès la santi toutbon vre se repriz la ki rive pou pèp ameriken an.

Sepandan, misye Obama sanble idantifye kèk zòn-limyè nan chif sonb sa yo. Li kontinye pale pou l di menm si to chomaj la toujou wo, li fè yon ti bese pa rapò a jan l te ye pandan peryòd Janvye-mas 2009 la ; e sektè finansye a ki t'ap fè fas ak gwo difikilte, rive estabilize l --yon sign ki montre ekonomi an sòti nan faz kote li te kapab debouche son yon dezas total.

«Sistèm kredi a, sistèm bankè a, mache finansye yo an jeneral, rive estabilize yo. Nou sispann wè konpòtman monte-desann, atitid yon jou bon, yon jou pa bon, ak panik nou te genyen devan nou anvan sa.»

Misye Obama fè deklarasyon sa yo sou ekonomi amerikèn nan nan yon brèf pwen-de-près nan La Mezon Blanch yè jedi 30 jiyè a, aprè li te fin fè yon rankont avèk prezidan Filipin nan, Gloria Arroyo Matapagal.

Jdesmara@voanews.com

XS
SM
MD
LG