Accessibility links

Yon Final Totalman Ameriken an Angletè


Tenis/ Wimbledon

Ameriken Serena Williams ap rankontre nan final tounwa tenis Wimbledon nan gran sè l Venus apre viktwa yo ranpòte Jedi 2 Juyè. Serena kalifye apre li elimine ak difikilte Rus Elena Dementieva nan yon match sere/sere 6-7, 7-5, 8-6 pandan 2 zhè-49 minit. Venus Williams fè 2 bouche ak Rus Dinara Safina 6-1, 6-0 nan yon rankont ki dire sèlman 51 minit. 2 sè yo rankontre 2 fwa nan final kote Venus ranpòte tou 2 rankont yo.

Nan kategori maskilen, Vandredi 3 Juyè Swis Roger Federer ap rankontre Alman Tommy Haas nan semi final la. Britanik Andy Murray ap rankontre ameriken Andy Roddick

Foutbòl/ Ayiti

Seleksyon nasyonal foutbòl ayisyen an, kap prepare pou koup dò KONKAKAF la, fè match nul 0 a 0 ak klub Kanadyen Enpak de Montreal. Ayiti te pèdu premye rankont li te fas la Siri 2 a 1. Ayiti dwe jwe yon lòt rankont avan li mete tèt pou Seattle Washington kote li pral patisipe nan koup dò KONKAKAF la.

Foutbòl/ FIFA

Brezil ekate Espay pou l pran tèt klasman mondyal apre yon lane. Tit koup konfederasyon an ede Brezilyen yo klase numewo 1 mondyal devan Espay. La Oland ki kalifye pou faz final koup du mond klase 3 zièm answit nou jwen Itali, Almay, la Rusi, Angletè, Arjantin, la Frans ak Kwasi ki konplete lis 10 premye peyi nan nouvo klasman FIFA a. Etazini ki te fini an 2 zièm nan koup konfederasyon an FIFA a, klase 12 zièm nan zòn KONKAKAF la devan Kosta Rika ki klase 30 tièm. Meksik klase 33 zièm.

Nan Karayib la Jamayik klase 65 kièm, devan Trinidad and Tobago 72 zièm, Kiba, ki pap patisipe nan koup dò KONKAKAF la klase 85 kièm. Ayiti klase 120 tièm.

Natasyon/ Etazini

Najè ameriken Dara Torres, ki ranpòte 5 meday olenpik, ap pare pou subi yon gwo entèvansyon chirurjikal nan pye goch li apre chanpyona du mond natasyon ki gen pou dewoule nan vil Wòm an Itali.

Natasyon/ Espay

Najè Espayòl Aschwin Wildeboer Faber bat yon rekò du mond nan kous 100 mèt Je Mediterrane kap dewoule nan vil Pescara an Itali.

XS
SM
MD
LG