Accessibility links

Breaking News

Pewou : Gouvènman an Ap Pare Pou Revoke Lwa Sou Itilizasyon Tè Yo


Nan peyi Pewou, premye minis la Yehude Simon anonse gouvènman an pral pwopoze pou revoke lwa sou eksplwatasyon gaz natirèl ak fouy pou petwòl ---- lwa ki te lakoz pawòl anpil ak manifestasyon vyolan nan rejyon amazonik yo o Pewou.

Premye minis Simon pale konsa lendi 15 jen an nan moman li menm ak lòt responsab gouvènman an tap rankontre kèk lidè endijèn ki reprezante divès rejyon nan Amazòn nan. 22 polisye ak 30 endyen te pèdi lavi yo nan lese-frape ki te dewoule, sa pa gen lontan, pandan yo tap manifeste kont itilizasyon tè yo pou rezon nou sot mansyone la yo.

Depi mwa davril la, manifestan yo te bloke wout ak rivyè pou yo egzijke gouvènman an revoke lwa sa yo ki mete an danje lavi pèp endijèn yo nan rejyon Amazòn nan. Manifestan yo di lwa sa yo ankouraje konpayi etranje pou yo vinn ouvè min e fouye pwi petwòl nan Amazòn nan. Prezidan peruvyen an Alan Garcia di li te pran dekrè yo pou atire envestisè nan peyi a. Kongrè Pewou a, bò kote pa l, te sispann dekrè sa yo pou wè si l ta rezoud kriz la.

Avan sa, Pewou te raple anbasadè li genyen nan Bolivi a apre kòmantè prezidan bolivyen Evo Morales ki kondane fason gouvènman peruvyen an ap jere konfli avèk endijèn yo. Responsab yo nan Lima di lendi, anbasadè Fernando Rojas rantre nan peyi l pou konsiltasyon apre akizasyon mesye Morales ki konsidere aksyon otorite Pewou nan konfli Amazòn yo kòm yon jenosid.

XS
SM
MD
LG