Accessibility links

Aksidan Sikilasyon Trajik Sou Wout Nasyonal No 1 an An'n Ayiti


Semèn nan ap fini sou yon trajedi nan peyi Dayiti kote 10 moun pèdi lavi yo e plis pase 20 lòt blese nan yon kolizyon ant 2 kamyon ki tap transpòte pasaje sou twonson wout Nasyonal nimewo 1 an, ant Lakayè ak vil Sen-Mak. Dapre enfòmasyon korespondan nou ranmase nan bouch temwen se vitès 2 kamyon yo tap fè ki responsab kolizyon an. Clarens Renois devlope nouvèl sa a pou Lavwadlamerik nan yon korespondans depi vil Pòtoprens.

Antretan, yon gwo responsab gouvènman prezidan Barack Obama a fè chita-pale jodi vandredi 6 mas lanan Eta Florid ak kèk militan kap defann kòz imigran ilegal ayisyen (30 mil anviwon) Sèvis Imigrasyon Etazini vle depòte nan peyi Dayiti. Ronald César, chèf Sèvis Kreyòl la te pale ak Jean-Robert Lafortune, youn nan moun ki te patisipe nan chita-koze sa a. Koute kont-randi li sou ralonj ki mache ak atik sa a.

Sekretè-jeneral Nasyonzini an, Ban Ki-Moon dwe fè yon vizit Ayiti madi ki va 9 mas la ansanm ak ansyen prezidan Etazini Bill Clinton. Pòtpawòl mesye Ban nan, Michèle Montas di Lavwadlamerik objektif vizit sa a se pou yo rankontre ak responsab gouvènman ayisyen an e diskite sou kèk pwojè pou relanse ekonomi ayisyèn nan.

Yon lòt kote, Bank Mondyal fè Ayiti yon don 5 milyon dola pou ede nasyon karibeyen an rebati lekòl ki te kraze ou sibi dega nan seri siklèn ak tanpèt twopikal ki te devaste plizyè Depatman peyi a nan sezon Ete 2008 la.

NB: Devlopman tout tèm sa yo sou ralonj ki anwo e adwat paj wèb sa a.

XS
SM
MD
LG