Accessibility links

Breaking News

Prezidan Obama ap Chache Apui Repibliken yo Pou Plan Ekonomik li a


Prezidan ameriken an, Barack Obama, ap mennen kanpay ak tout fòs li pou wè si Kongrè a ta apwouve plan relans ekonomik li a ak yon majorite demokrat ak repibliken. Dimanch, Prezidan Obama voye Vis-Prezidan Joe Biden ak prensipal konseye ekonomik li yo al’ fè pwomosyon pou plan an, nan emisyon televizyon ameriken yo. Joe Biden te raple telespektatè CBS yo ke kriz la grav e pa gen tan pou pèdi.

Li di: "sa ap vin pi mal chak jou. Nan pwen bon nouvèl ditou."

Nan Rankont ak Laprès (Meet The Press) sou NBC, Konseye Ekonomik Mezon Blanch la, Lawrence Summers, di ekonomi Etazini pi mal kounye a pase nan tout lòt epòk depi Dezyèm Gè Mondyal la, e Prezidan Obama ap chache yon ekilib ant nouvo depans leta ak rediksyon enpo.

Sepandan, Repibliken yo deja ap file zepon yo. Lidè minorite nan Chanm Reprezantan yo, John Boehner, te nan NBC tou. Li deklare: "pou kounye a, akoz sousi kòleg mwen yo genyen sou kantite lajan plan an ap koute (swa anviwon 825 milya dola), ak tout depans ki ladan n, nou pa kwè lap reyisi." Msye Boehner predi pifò Repiubliken ap vote kont plan an si li parèt jan l’ye kounye a.

Prezidan Obama te rankontre vandredi nan Lamezon Blanch ak lidè 2 Chanm yo, Repibliken kou Demokrat, e madi 27 janvye a, l' ap deplase al nan Kapitòl la pou li chita diskite ak lidè repibliken yo e chache pran tèt yo pou yo ka soutni plan relans ekonomik la.

Lamezonblanch di plan sa a pral kreye 4 milyon nouvo djòb. An 2008, sektè travay la Ozetazini te pèdi 2 milyon 600 mil anplwa.

Ou ka koute oubyen kopye repòtaj sa a si ou fè klik sou ralonj ki adwat paj la.

XS
SM
MD
LG