Prezidan Eli Etazini an Rankontre ak Prezidan Meksiken an Felipe Calderon

Prezidan eli ameriken an, Barack Obama, fè chita tande ak prezidan meksiken an, Felipe Calderon nan premye rankont mesye Obama ak yon lidè etranje depi eleksyon novanm 2008 yo. Prezidan eli Etazini an di li menm ak prezidan Calderon te diskite sou imigrasyon, sekirite fwontyè 2 peyi yo e sou divès lòt kesyon ankò pandan dine yo te genyen yè lendi a nan Sant Kiltirèl meksiken an nan Washington DC. Mesye Obama di yo te diskite tou sou fason pou yo jwenn yon bon jan plan imigrasyon ki kapab vrèman ranfòse 2 peyi yo.

Mesye Calderon presize, bò kote pa l' "plis Meksik an sekirite se plis Etazini ap an sekurite, e ke 2 peyi yo dwe travay nan konsètasyon pou konbat fenomèn krim òganize a". Mesye Calderon ap mennen yon gwo konba kont trafikan dwòg yo depi li monte sou pouvwa a an 2006. Malgre sa, vyolans pa sispann ravaje Meksik. Responsab yo di omwen 5.700 moun mouri ane pase nan vyolans ki makonnen ak trafik dwòg.

Prezidan kostariken an, Oscar Arias dekrete 5 jou dèy ak yon eta durjans akòz tranblemand’ tè semèn pase a ki pran lavi 19 moun pou pi piti. Yon tranblemand’ tè ki te gen yon magnitid 6.1 frape Kosta-Rica jedi dènye kote li pwovoke glisman teren e bloke wout ki mennen nan otèl ak rejyon ki nan nò kapital-la, San José. 23 moun pa reponn alapèl. Omwen 250 fanmi pa gen kote pou yo rete apre sekous sismik sa a ki te santre sou yon distans 35 kilomèt nan rejyon nòdwès San José.

Pandansetan nan Kolonbi, prezidan Alvaro Uribe pwopoze pou Vatikan bay asistans pou sekurize liberasyon 6 otaj gwoup rebèl Fòs Zame Revolusyonè Kolonbi a pwomèt pou li lage yo. Prezidan Uribe deklare yè lendi a nan Bogota, "si Legliz Katolik Womèn vle ede asire liberasyon otaj sa yo, gouvènman kolonbyen an ap bay otorizasyon e lap bat bravo pou tip asistans sa a. Mesye Uribe fè deklarasyon sa a nan moman lap prepare l' pou yon vwayaj Ozetazini. Vatikan poko reaji sou demand sa a.

Nan peyi Kiba, pwopriyetè oto yo resevwa otorizasyon pou yo aplike pou lisans taksi e yap kapab fikse yo menm pri kous-yo pou la premyè fwa depi 1999. Chanjman sa a enskri nan kad demanch gouvènman kuben an pou l' amelyore sistèm transpò piblik kiben an ki nan yon eta deplorab. Otobis, kèk ansyen tren ak taksi ki koute chè ap asire transpò pasaje pou sèlman yon minorite nan populasyon kubèn nan. Gen anpil veyikil an sikilasyon tankou “ voitures de collection americaines “ ki la depi avan revolisyon ki te mennen ansyen prezidan Fidel Castro sou pouvwa a nan Kiba, an 1959.