Accessibility links

Prezidan-Eli Barack Obama Pral Parèt Ak Yon Plan Relans Ekonomik Plizyè Santèn-Milya Dola


Yon gwo asistan Prezidan-eli Barack Obama deklare pwochen administrasyon an mentni angajman n pou li mete ann aplikasyon yon plan relans ekonomik pi vit posib. Stratèj kanpay Obama a, ki se yon gwo konseye l, David Axelrod, deklare sou televizyon maten an, Msye Obama vle kolabore ak konpayi otomobil yo (General Motors, Ford, ak Chrysler) sou plan sa a, tousuit apre li va fin prete sèman le 20 janvye.

Bo kote pa l, prezidan-eli a deklare nan mesaj li delivre yè samdi a nan non Pati Demokrat la ke plan relans ekonomik li a pral gen ladan n pwojè pou rekonstwi wout ak pon, modènize lekòl, e devlope lòt sous enèji ki pa chita sou petwòl. Barack Obama espere kreye, oubyen pwoteje, 2-milyon-edmi djòb nan 2 zan. Prezidan Komisyon Finans nan Sena a, Demokrat Charles Schumer (NY) di gouvènman an kapab bezwen depanse ant 500 a 700-milya dola nan plan relans ekonomik sa a. Li di Kongrè a pral travay ak Msye Obama pou prepare e vote plan an apre prestasyon sèman an, an janvye pwochen.

Pou sa ki konène fòmasyon Kabinè Obama a, se demen lendi a prezidan-eli a ta dwe anonse ofisyèlman ki moun kap fè pati ekip ekonomik li a. Men responsab nan tranzisyon an deja di ministè trezò a pral jwenn Timothy Geithner, ki se prezidan bank santral New York la.

Tankou plizyè lòt sitwayen msye Obama nonmen nan gouvènman n nan, Timothy Geithner te travay sou gouvènman Bill Clinton nan.

Ansyen minis trezò Clinton Lawrence Summers ap Direktè Konsey Ekonomik Mezonblanch la sou Obama, e ansyen minis enèji Clinton Bill Richardson pral minis komès sou Obama.

Richardson, ki gouvènè eta Nouvo-Meksik se youn nan kandida ki pat rive lwen nan eleksyon primè demokrat yo e ki te rale kò l pou finalman li te apiye Barack Obama olye de Hillary Clinton.

XS
SM
MD
LG