Amerikèn Venus ak Serena Williams ap rankontre nan final tounwa tennis senp medam yo nan vil Londres apre yo ranpòte demi final yo jedi 3 jiyè a. Venus, chanpyòn ane pase a e tèt de seri nimewo 7 ane sa a, ranpòte 8 nan 9 premye je yo pou l' elimine tèt de seri nimewo senk lan, rus Elena Dementieva an 2 sèt youn dèyè lòt (6-1, 7-6)
Serena, tèt de seri nimewo 6, elimine tou nan 2 manch chinwaz Zheng Jie sou yon skò ki sanble preske ak skò Venus la: 6-2, 7-6. Serena ak Venus rankontre 2 fwa deja nan final tounwa tennis Wimbledon nan (2002 ak 2003) e nan tou 2 okazyon yo se ti sè a, Serena, ki ranpòte laviktwa pou l' dekwoche twofe a.
Venus pran tit chapyòn Wimbledon nan 4 fwa nan karyè li, swa 2 fwa plis pase Serena. Nan quart de finale mesye yo, alman Rainer Schuettler kale an 5 manch fransè Arnaud Clément: 6-3, 5-7, 7-6, 6-7, 8-6. Schuettler pral kwaze rakèt ak espayòl Rafael Nadal.
Nimewo 1 mondya la suis, Roger Federer, dwe tope kòn li ak rus Marat Safin nan demi final.