Zimbabwe: Kandida Opozisyon an Rale Kò l Nan Eleksyon 27 Jen an

Nan peyi Zimbabwe, lidè opozisyon an, ki te ranpòte majorite vòt nan premye tou prezidansyèl mwa mas la, anonse yon desizyon ki siprann anpil moun jodi a: li pap patisipe nan dezyèm tou 27 jen an. Morgan Tsvangirai, ki alatèt Mouvman pou Chanman Demokratik la, MDC, di li rale kò l akòz vyolans ak zak kraponnay kap miltipliye kont patizan n yo.

Tsvangirai di, Nou menm nan MDC detèmine ke nou pap pran pa ankò nan "processus" elektoral sa a ki se yon maskarad, ki pa lejitim, e ki vyolan. Li di Prezidan Robert Mugabe ak pati ZANU-PF la fè tout sa yo kapab pou yo diskredite vòt 27 jen an. Dapre li, gen twòp moun ki mouri, e twòp moun kite kay yo palafòs, nan yon pwen tèl ke pèp la twouve l anfas yon chwa: swa li vote pou pati ki sou pouvwa a (ZANU-PF), oswa li fè fas ak lanmò.

Ajans nouvèl Associated Press fè konnen Minis Enfòmasyon Zimbabwe a, Sikhanyiso Ndlovu, deklare eleksyon an pral fèt kanmenm vandredi e sa pral pwouve ke Zimbabweyen yo apiye Prezidan Mugabe kap dirije peyi a depi li te pran endepandans li an 1980.