Accessibility links

Breaking News

Etazuni ak Honduras Kalifye pou Je Zolenpik yo


Football

Etazuni ak Honduras ap reprezante zòn KONKAKAF la nan je zolenpik Peken 2008 yo apre yo kalifye pou final eliminatwa konpetisyon ki tap jwe nan Nashville, Tennessee Etazuni rive nan final la apre li pase Kanada yon swif 3 a 0 pandan ke Honduras kale Gwatemala sou tir de penalite 6 a 5 apre 2 pwolongasyon.

Klub Kosta Riken Deportivo Saprissa tronse klub Meksiken Atlante 3 a 0 pou kalifye nan semi final konkakaf dè klub chanpyon ak vis Chanpyon. Nan semi final ale kap kòmanse nan debu mwa Avril la Houston Dinamo ap ranontre Deportivo Saprissa epi DC United pral mate balon kont klub Meksiken Pachuka.

Unyon Football Eropeyen an enpoze yon penalite 5 mil dola kont klub footbal franse Lyon apre yon fanatik te limen yon flash nan zye Cristiano Ronaldo kap jwe nan Manchester United.

Unyon Football Eropeyen frape amand ak plizyè lòt klub tankou Atletiko Madrid ki gen pou peye 30 mil dola apre fanatik yo te lage pidetwal sou teren an. Bolton ap peye 10 mil dola amand. Klub Nòvejyen SK Brann ap peye yon amand 15 mil dola pandan ke klub angle Everton ap peye 5 mil dola. Tout amand sa yo gen pou wè ak move konpòtman fanatik yo.

Antrenè Italyen Fabio Cappello ajoute David Beckham sou lis jwè li konvoke nan kad match amikal kont la Frans. Beckham espere pote mayo seleksyon an pou yon 100 tièm fwa si antrenè Capello pèmèt li jwe rankont la.

Basketball

Tounwa basketball Mas an Foli a ap rapousib jodi a apre rankont ki dewoule yè swa.

Univèsite Duke pase yon move moman fas a Belmont yè Jedi a isit Washington avan yo ranpòte yon viktwa de justès 71 a 70 nan kad tounwa basketball Univèsitè yo ke nou rele Mas an Foli. Greg Handerson make 2 pwen kèk sekond avan fen tan reglemantè pou evite Duke subi yon umilyasyon. Xavier remonte yon defisi 11 pwen pou l kale Georgia Bulldogs 75 a 61. Georgia kalifye nan tounwa malgre yon move sezon. Poko gen supriz nan tounwa a juska prezan apre match Duke kont Belmont an ki te kreye anpil suspenn.

Bò kote pwofesyonèl yo Boston Celtics te fè anpil efò avan li kale Dallas Marvericks 94 a 90. Sa fè 3 zièm ekip nan konferans de Lwès la ki pèdu devan Boston Celtics pandan yon menm semen. San Antonio Spurs danse sou Chikago Bulls 102 a 80 gras ak 23 pwen franse Tony Parker make. Kobe Bryant make 27 pwen pou ede Los Anjeles Lakers wouze Utah Jazz 106 a 95.

Olenpik/ Bush

La Mezon Blanch fè konnen prezidan Bush toujou gen plan pou l al asiste seremoni douvètu je zolenpik yo nan vil Peken an Chin malgre operasyon sere boulon la chin ap mennen nan Tibè kont manifestan yo. Yon pòt pawòl Mezon Blanch la di msye Bush kwè Je Zolenpik yo dwe zafè atlèt e pa nesesèman konsènan politik.

Tennis

Numewo 1 tenis mondyal la Swis Roger Federer ap rankontre alman Tommy Haas epi ameriken Mardy Fish pral kwaze rakèt ak ajanten David Nalbadian nan kar de final tounwa tenis Pan Pasifik la kap dewoule nan Indian Welles an Kalifòni. Toujou jodi a bò kote meda m yo chanpyon ostralyen Maria Sharapova ap kontre konpatriòt li Svetlana Kuznetsova nan semi final konpetisyon an. Nan lòt semi final la nou jwen Sèb Ana Ivanovic kont konpatriòt li Jelena Jankovic. Yè swa Sèb Novak Djokovic te kalifye pou semi final tounwa apre li elimine Swis Stanislas Wawrinka 7-6, 6-2. Bo` kote meda m yo Ana Ivanovic, yon lòt Sèb, te kalifye pou semi final la apre li wouze ak kout rakèt Rus Vera Zvonareva 6-1, 6-4. Jelena Jankovic kale ameriken Lindsay Davenport pa fòfè apre li te finn ranpòte premye manch la. Davenport tap soufri ak yon doulè nan do.

Venkè kategori maskulen an ap foure nan pòch li 555 mil dola epi kategori meda m yo ap resevwa 332 mil dola.

Natasyon

Yon najè Sèb ekspulse nan chanpyona natasyon Eropeyen kap dewoule nan La Oland akoz li te gen yon mayo ki pote ensiy Kosovo se teritwa Sèbi. Milorad Cavic, meday dò kous 50 mèt papiyon an, te pote mayo a nan okazyon seremoni remiz meday. Federasyon natasyon Sèb la ap peye yon amand prèske 11 mil dola-desizyon federasyon kapab ale an apèl.

Najè Olandè Marleen Veldhuis ranpòte yon 2 zièm meday dò nan chanpyona natasyon Eropeyen an kap dewoule nan la Oland. Marleen ranpòte kous 100 mèt naj lib la devan Finlandè Hanna-Maria Seppala ak olandè Inge Dekker..Franse Laure Manaudou bat yon rekò Eropeyen nan semi final la 100 mèt la planch la. Gergo Kis ranpòte konpetisyon 800 mèt naj lib la devan Italyen Samuel Pizzetti ap woumen Dragos Coman.

XS
SM
MD
LG