Accessibility links

Tounwa  Baskètball Univesitè yo Demare Jodi a


Basketball

Tounwa basketball Univèsitè yo ki rele Mas an Foli an demare jodi a ak patisipasyon 64 ekip. Tounwa eliminasyon dirèk la ap dewoule pou la premyè fwa san patisipasyon finalis sezon pase a Florida ak Ohio State ki pa kalifye. 64 ekip yo divize an 4 rejyon ki gen 16 ekip nan chak. Venkè chak rejyon ap kalifye pou semi final nasyonal la.

Bonzi Wells make 25 pwen nan rakle 90 a 69 New Orleans Hornets pase Houston ki subi 2 zièm defèt afile apre yo finn ranpòte 22 rankont youn apre lòt. Philadelphia 76ers suprann Denver Nuggets ak yon vkktwa 115 a 113. Se premye rankont Allen Iverson jwe lakay ansyen ekip la depi Philadelphia 76ers te boukante l ak Denver Nuggets an Desanm. Nan Seattle Phoenix Suns wouze ekip lokal Seattle Supersonics 110 a 98. Lebron James make 30 pwen pou ede Cleveland Cavaliers toupizi Detroit Pistons 89 a 73. Golden State Warriors, Toronto Raptors, New Jersey Nets, Washington Wizards,Indiana Pacers ak Minnesota Timberwolves yo tout ranpòte la vikwa yè swa.

Football

Nan match kalifikatif pou je zolenpik yo, Gwatemala pral mate balon fas a Honduras nan semi final la epi Etazuni ap rankontre Kanada nan Nashville, Tennessee

Houston Dinamo suprann klub Gwatemaltèk CSD Municipal ak yon viktwa 3 a 1 pou l pase nan semi final la chanpyona KONKAKAF dè klub chanpyon ak vis chanpyon. Dinamo ap rankontre nan semi final la venkè ramkont aswè a ant klub Kosta Riken Deportivo Saprissa ak klub Meksiken Atlante. Pachuka kale klub Honduryen Motagua 1 a 0 pou l pase nan semi final la kote li pral rankontre DC United nan kòmansman mwa Avril la.

Federasyon Football Bolivi a anonse plan pou l ale an apèl ak desizyon FIFA pran pou l entèdi rankont jwe nan altitud ki depase 3 mil mèt a mwens ke jwè ekip advès la gen 3 semen pou adapte l ou mwens tou depann de kote rankont la ap dewoule. Dapre nouvo règleman yo Bolivi pap kapab jwe oken rankont football entènasyonal nan La Paz akoz li situe nan yon tèt mò n anviwon 3 mil 600 mèt. Federasyon an espere Tribunal Abitraj Spòtif la ap mande FIFA pou l leve entèdiksyon an.

FIFA bay federasyon football Madagascar la yon bwa long kenbe akoz entèferans gouvènman an nan zafè football peyi a. FIFA bay gouvènman an 3 jou pou l retire yon dekrè li publiye--dekrè ki disoud federasyon an. Yè Mèkredi a kou Suprèm peyi a te kore dekrè gouvènman an e san pèdu tan FIFA enpoze sanksyon an. FIFA refuze rekonèt yon komite pwovizwa pou jere zafè football peyi a.

Desizyon an kapab afekte patisipasyon Madagascar nan eliminatwa koup du mond 2010 la ansanm ak Koup Konfederasyon Afriken an. Ministè Spò Malgach la te revoke federasyon an epi mande nouvo eleksyon apre lese frape ant la polis ak fanatik yo akoz anulasyon yon match Lig chanpyon. Gouvènman an rann federasyon an responsab ensidan an.

Atakan Olandè Ruud Van Nistelrooy, kap jwe nan Real Madrid, ap absan pou 6 semen apre li subi yon entèvansyon nan peyi l yè Mèkredi a.

Pou la premyè fwa depi 1994 seleksyon football ameriken an prale nan Wemble kote yo pral jwe yon match amikal kont Angletè 28 Me kap vini la a.Etazuni ap sèvi ak rankont la nan kad preparatif lap fè pou eliminatwa koup du mond zòn KONKAKAF la pandan ke Angle yo, ki elimine nan koup dEròp dè nasyon an, ap sèvi nan kad kreyasyon yon seleksyon djanm antrenè Italyen Fabio Capello ap mete sou pye pou eliminatwa koup du mond zòn Eropeyen an.

La Frans publiye yon lis pwovizwa 39 jwè nan kad preparasyon pou 2 match amikal kont Angletè ak Mali.

Football brezilyen Kaka kapab pa disponib nan match chofe jarèt brezil pral jwe kont la Swèd nan vil Lond semen pwochè nan.

Nouvèl ki soti an chin fè konnen federasyon football peyi a revoke antrenè seleksyon feminen an Franse Elisabeth Loisel. Federasyon an gen pou l peye antrenè a 113 mil dola kòm domaj pou tèt li mete fen nan kontra a twò bonè.

Tennis

Rus Maria Sharapova ranpòte 18 tièm viktwa afile l apre li tronse Slovak Daniella Hantuchova 7-6, 6-1 nan tounwa tenis Indian Wells la kap dewoule nan Kalifòni. Ansyen chanpyon US Open Rus Svetlana Kuznetsova elimine Agnieszka Radwanka 6-2, 6-4.

Bò kote mesye yo Swis Roger Federer pase Kwat Ivan Ljubicic 2 kout rakèt 6-3, 6-4. Espayòl Rafael Nadal te fè anpil efò avan li kale franse Jo-Wilfred Tsonga 6-7, 7-6, 7-5. Ameriken James Blake te bezwen 2 manch pou l debarase l de franse Richard Gasquet 6-4, 6-2. Madi Fish, yon lòt ameriken te fè anpil efò avan li kale Ostralyen Lleyton Hewitt 7-5, 3-6,7-6.

XS
SM
MD
LG