Accessibility links

Balon ap Woule nan KONKAKAF la


Football

Chanpyona KONKAKAF dè klub chanpyon ak vis chanpyon ap demare jodi Madi 11 Mas la ak patisipasyon 8 klub. Chanpyon sòtan an klub Meksiken Pachuca pral lakay CD Motagua de Honduras pou kar de final la. Klub Jamayiken Habour View ap akeyi DC United. Klub Meksiken Atlante FC ap akeyi klub Kosta Riken Deportivo Saprissa. CSD de Gwatemala ap akeyi klub ameriken Houston Dinamo. Match retou a fikse pou 18 -20 Mas.

Venkè seri ale/retou a ap kalifye pou semi final la ki fikse pou 1-3 Avril nan match ale a epi match retou a fikse nan yon semen. Venkè yo ap kalifye pou jwe final ale 22-24 Avril epi match retou a 29 Avril -1 Me. Chanpyon an ap reprezante rejyon KONKAKAF la nan koup du mond klub yo kap dewoule O Japon nan fen ane a.

Dapre règleman yo chak klub kapab enskri juska 30 jwè nan sekretarya jeneral la avan yo seleksyone 23 jwè 48 thè avan chak rankont. Sou lis 23 jwè a 18 jwè ap seleksyone pou rankont la.

Soti jodi 11 Mas pou rive 23 Mas Etazuni ap akeyi faz final eliminatwa je zolenpik yo pou zòn KONKAKAF la kap pèmèt 2 peyi reprezante rejyon an an nan je zolenpik Peken ane sa a.

Nan Tampa Florid kote group B a ap jwe Panama ap rankontre Honduras epi Etazuni kont Kuba. Nan Karson an Kalifòni demen Mèkredi 12 Mas Ayiti kont Gwatemala epi epi Kanada kont Meksik. 2 premye nan chak group yo ap kalifye pou semi final la. Finalis yo ap kalifye pou je zolenpik yo.

6 ansyen manb patnè komèsyal FIFA ap juje nan tribunal jodi a pou patisipasyon yo nan magouy ak move jesyonè, fo dokuman. Akuzasyon ansyen responsab yo rejte. Si la justis jwen 6 mesye yo koupab yo kapab pase juska 4 tran edmi prizon.

Nouvèl ki soti ann Itali fè konnen Ronaldo retounen Milan apre operasyon li te subi sa gen 26 jou. Yon staj dirijan nan klub-la te vinn akeyi atakan brezuilyen. Ronaldo pral kòmanse yon faz re-edukasyon dabò ann Itali ,e apre O Brezil.

Seleksyon football feminen ameriken kalifye pou final konpetisyon apre li pilon-nen Norvèj 4 a 0. Ameriken yo pral rankontre Danmak ki ranpòte yon viktwa tou mens 1 a 0 devan 1 a 0 nan final la ki fikse pou demen.

Basketball

Houston Rockets kontinye ap koleksyone viktwa sou viktwa. Viktim yè swa-a rele New Jersey Nets ke-l van-nen 91 a 73 yo . Sa fè 19e viktwa . Boston Celtics wouze Philadelphia 76ers 100 a 86. Cleveland Cavaliers te redi avan li kale Portland Trail Blazers 88 a 80. Denver Nuggets tonbe devan San Antonio Spurs 107 a 103. Atlanta Hawks fè bèk atè devan Orlando Majik 123 a 112.. Dallas Marvericks danse sou New York Knicks 108 a 79 pandanke Los Anjeles Clippers ranpòte yon viktwa de justès 99 a 98.

Atletisme

Atlèt gwo kalib ak responsab gouvènmantal reyuni nan Jordan pou diskute fason pou bay patisipasyon meda m yo bourad nan je zolenpik yo ak lòt konpetisyon. 500 atlèt feminen patisipe nan rankont brase lide a ki dure 3 jou. Patisipan yo espere wè yon ekilib nan je zolenpik pou jè n yo ki gen pou dewoule an 2009. Prezidan komite Olenpik Entènasyonal la ki te pran la pawòl nan sikonstans la fè konnen fanm yo reprezante prèske la mwatye patisipan nan je zolenpik Peken yo.

Cyclisme

Siklis Bèlj Gert Steegmans ranpòte premye etap kous bisiklèt Pari / Nis la men Norvejyen Thor Hushovd toujou nan tèt klasman jeneral la ak 6 sekond devan venkè premye etap la.

Tennis

Nan yon match dekzibisyon ki dewoule nan Madison Square Garden nan New York, numewo 1 mondyal maskulen-an susi Roger Federer(26 zan) kale ansyen numewo 1 mondyal ameriken Pete Sampras (36 zan ) 6-3, 6-7, 7-6, ki donk 2 sèt a 1. Oganizatè-yo fè 19.700 dola nan match-la. 2 jwè-yo mete ansanm ranpòte 26 tounwa Gran Chelem.

XS
SM
MD
LG