Accessibility links

Breaking News

La Chin Dejwe yon Menas


Olympics

Komite òganizatè je zolenpik yo eksprime konfyans konpetisyon an ap garanti sekurite pou patisipan yo. Anons la fèt yon jou apre otorite yo anonse yo dejwe 2 plan ki te vize kreye la troublay pandan konpetisyon.

Atletisme

Detantè rekò du mond maraton Etyopyen Haile Gebrselassie anonse li pap patisipe nan maraton je zolenpik Peken yo akoz kè sote li genyen pou polusyon pa afekte eta sante l. Malgre tou Gebrselassie, kap soufri ak astm, deklare jodi a li pa fè retrè total nan je yo li kapab patisipe nan kous 10 mil mèt la. Komite Olenpik Entènasyonal la deja eksprime sousi l konsènan enpak konpetisyon long distans yo kapab genyen sou sante patisipan yo.

Kourè Rus Yelena Soboleva bat pwòp rekò du mond li te bat nan kous 1500 mèt nan okazyon chanpyona du mond atletis an sal ki tap dewoule nan Valans an Espay. Soboleva kouvri distans la an 3 minit 57 pwen 71 /100 tièm sekond devan konpatriòt li Yulia Fomenko ak Etyopyen Gelete Burka. Nan tablo meday yo Etazuni fini nan tèt konpetisyon an ak yon total 13 meday pami yo 5 an ò. La Rusi klase 2 zièm ak yon total 12 meday pami yo 5 an ò epi Etyopi klase 3 zièm ak 6 meday pami yo 3 an ò.

Tennis

Jwè tenis ameriken Sam Querry ranpòte premye tounwa tenis Asosyasyon Tenis Pwofesyonèl nan karyè l ki tap dewoule nan Las Vegas Nevada. Querry wouze ak kout rakèt Sud Afriken Kevin Anderson 4-6, 6-3, 6-4.

Ameriken Serena Williams ranpòte tounwa tenis Bangalore la ki tap dewoule an End apre viktwa an 2 manch li ranpòte devan Swis Patty Schnyder 7-5, 6-3. Se premye tounwa tenis Serena Williams ranpòte pandan ane a.

2 pi gran jwè tenis nan 10 dènye ane yo gen pou jwe yon match ekzibisyon aswè a nan Madison Square Garden nan New York. Ansyen numewo 1 mondyal ameriken Pete Sampras, ki te pran retrèt li an 2002, pral kwaze rakèt ak aktuèl numewo 1 mondyal la Swis Roger Federer. Sa pa gen lontan 2 jwè yo te jwe 3 match amikal sou kontinan Azyatik la. Roger Federer te ranpòte 2 pami 3 rankont yo.

Football

Chanpyona KONKAKAF dè klub chanpyon ak vis chanpyon ap demare demen Madi 11 Mas ak patisipasyon 8 klub. Dapre règleman yo chak klub kapab enskri juska 30 jwè nan sekretarya jeneral la avan yo seleksyone 23 jwè 48 thè avan chak rankont.

Sou lis 23 jwè a 18 jwè ap seleksyone pou rankont la. Chanpyon sòtan an klub Meksiken Pachuca pral lakay CD Motagua de Honduras pou kar de final la. Klub Jamayiken Habour View ap akeyi DC United. Klub Meksiken Atlante FC ap akeyi klub Kosta Riken Deportivo Saprissa. CSD de Gwatemala ap akeyi klub ameriken Houston Dinamo. Match retou a fikse pou 18 -20 Mas.

Venkè seri ale/retou a ap kalifye pou semi final la ki fikse pou 1-3 Avril nan match ale a epi match retou a fikse nan yon semen. Venkè yo ap kalifye pou jwe final ale 22-24 Avril epi match retou a 29 Avril -1 Me. Chanpyon an ap reprezante rejyon KONKAKAF la nan koup du mond klub yo kap dewoule O Japon nan fen ane a.

Soti 11 pou rive 23 Mas Etazuni ap akeyi faz final eliminatwa je zolenpik yo pou zòn KONKAKAF la kap pèmèt 2 peyi reprezante rejyon an nan je zolenpik Peken ane sa a. Nan Tampa Florid kote group B a ap jwe Panama ap rankontre Honduras epi Etazuni kont Kuba. Nan Karson an Kalifòni Mèkredi 12 Mas Ayiti kont Gwatemala epi epi Kanada kont Meksik. 2 premye nan chak group yo ap kalifye pou semi final la. Finalis yo ap kalifye pou je zolenpik yo.

Unyon Football Eropeyen an louvri yon ankèt sou akuzasyon kòm kwa fanatik klub footbal franse Lyon te gen move konpòtman pandan match ale lig dè chanpyon Eropeyen an fas ak Manchester United. Otorite yo pral fè deba sou kesyon an 20 Mas kap vini la a. 2 ekip yo te fè match nul 1 a 1 nan match ale a. Manchester United kalifye pou kar de final la apre li ranpòte match retou a 1 a 0

Defèt 2 a 1 Barselòn subi devan Villarreal yè Dimanch mete an suspens tantativ klub la ap fè pou l ranpòte chanpyona premyè divizyon espayòl la. Ak 11 jounen ki manke pou chanpyona a fini Barselòn ap trenen ak 8 pwen dèyè lidè chanpyona a Real Madrid.

Nouvo antrenè seleksyon Iranyen an Ali Daei konfime yè Dimanch la espwa l pou ta gen yon match chofe jarèt ak Ekòs nan fen mwa a. Federasyon an di yap tann dizon Konsèy Òganizasyon Edukasyon Fizik sou relasyon Etranjè a avan yo kòmanse demach yo. Iranyen yo ap pare pou rankontre Bahren avan yo rankontre Koweit nan match kalifikatif koup du mond football 2010 la.

Nan yon entèviou ki publiye yè Dimanch la prezidan komite Olenpik Entènasyonal la eksprime posibilite pou l renegosye antant li gen ak FIFA pou meyè footballè ta patisipe nan je zolenpik yo. Règleman aktyèl la otorize sèlman 3 jwè seniò patisipe nan seleksyon olenpik la.

Prezidan FIFA a Sepp Blatter fè konnen li posib pou utilize gazon atifisyèl pandan dewoulman koup du mond football 2010 la an Afrik du Sud. FIFA ap pran yon desizyon sou kesyon apre koup Konfederasyon an kap dewoule nan fen ane a an Afrik du Sud.

Otorite yo FIFA yo lese tonbe ide pyès elektronik ki tap enstale apre liy gòl la pou enfòme abit yo lè balon an depase liy la. FIFA di rezon rezulta tès yo pa sufi pou konvenk responsab yo a 100 pou 100.

Msye Blatter ki tap patisipe nan yon rankont an Ekòs pwofite mande 4 federasyon britanik yo pou seleksyone jwè angle sèlman pou ekip konjwen kap patisipe nan je Olenpik 2012 yo pou evite pwoblèm. Ekip britanik yo nan tout disiplin olenpik teyorikman fòme ak atlèt ki soti an Angletè, Ekòs, peyi dè Gal ak Irland du Nò akoz privilèj yo genyen nan mond football la depi plis pase 60 tan.

Basketball

Detroit Pistons kalifye pou faz final NBA a pou yon 7 tièm ane afile apre yo kale Chikago Bulls 116 a 109. Sakramento Kings ranpòte yon viktwa de justès devan Los Anjeles Lakers 114 a 113 apre Kobe Bryant manke yon 3 pwen kèk sekond avan fen tan reglemantè a. Phoenix Suns wouze San Antonio Spurs 94 a 87 pandan ke Toronto Raptors te fè anpil efò avan li kale Seattle Supersonics 114 a 106. Philadelphia 76ers danse sou Milwaukee Bucks 119 a 97.

Cyclisme

Siklis Nòvejyen Thor Hushovd ranpòte premye etap kous bisiklèt Pari/ Nis la malgre menas sanksyon Unyon Siklis Entènasyonal la ap fè sou patisipan yo. Responsab yo Unyon Siklis Entènasyonal la ki te swete siklis yo boycote konpetisyon an, di kous la pa legal akoz se federasyon siklis franse a kap dirije l. Ajans Anti dopaj franse a ap reyalize tout tès dròg e Unyon siklis entènasyonal la pa depeche pèsonn pou sanksyone konpetisyon an.

XS
SM
MD
LG