Accessibility links

Seleksyon Angle a Gen yon Nouvo Antrenè


Football

Asosyasyon Football Angle a aprouve nominasyon Italyen Fabio Capello kòm nouvo antrenè seleksyon Angle a. Nouvèl ki poko ofisyèl fè konnen Capello kapab resevwa 13 milyon dola lan lè lap siyen kontra a an Janvye pwochen-prèske 3 fwa salè ansyen antrenè seleksyon an tap touche. Premye tès pou Capello li pral fè l le 6 Fevriye lè Angletè ap rankontre la Swis nan yon match chofe jarèt avan yo rankontre la Frans 26 Mars nan vil Pari.

Capello ap vinn nan tèt seleksyon Angle a apre li finn antrene Milan AC ki li ede ranpòte 4 tit ansanm ak lig chanpyon an an 1994. Msye antrene Real Madrid, AS Wòm ak Juventus de Turen. O total Capello ranpòte 9 tit pandan 15 sezon li pase ap antrene 4 klub. Msye jwe 32 match pou seleksyon Italyen an.

Reyaksyon depaman sou nominasyon yon etranje nan tèt seleksyon an. Gen Footballè ki fè konnen aksyon an montre pa gen angle ki konpetan pou ranplase Steve MacClaren. Gen lòt moun ki kwè gen ase antrenè konpetan nan peyi a e ke li pat nesesè pou federasyon an anplwaye yon antrenè etranje.

Dimanch kap vini la a final koup du mond football mondyal klub yo ap dewoule ant klub Arjanten Boca Juniò ak klub Italyen Milan AC.

Responsab lig football Italyen an Antonio Matarese fè konnen kantite klub kap evolye nan chanpyona premyè divizyon Italyen an dwe redui a 18 olye de 20 pou pwoteje football peyi a nan moman frè publisite nan televizyon ap redui.

Yon magazin Angle non-men footbalè brezilyen Kaka kòm meyè footballè mondyal pou ane a. Arjanten Lionel Messi resevwa pri meyè jè n footballè pou yon 2 zièm ane afile. Kaka deja resevwa balon dò Frans Football kòm meyè footballè kap evolye sou kontinan Eropeyen an. Lektè nan 48 peyi vote an favè Kaka.

Seleksyon Ekosè a kap chache yon nouvo antrenè, ap kòmanse kanpay kalifikasyon koup du mond 2010 la fas a Masedwa n 6 Septanb 2008 dapre nouvèl ki publiye jodi a. Kanpay la ap fini le 9 Septanb fas a la Holand.

Jenès Spòtif Kapwaz ak Valansya de Leogan ap monte nan chanpyona premyè divizyon ayisyen an apre yo kalifye pou final chanpyona 2 zièm divizyon an.

Olenpik

Responsab yo nan vil Jenèv an Swis fè konnen vil enterese pou l ta akeyi je zolenpik dhivè yo an 2018. Rezidan yo dwe aprouve lide a nan okazyon yon referandum avan fen 2009 la.

Basketball

Washington Wizards suprann Miami Heat a domisil ak yon viktwa 104 a 91 gras ak 26 pwen Deshawn Stevenson make nan rankont la ki dewoule yè swa nan Miami. Nan lòt rankont Kobe Bryant make 30 pwen pou ede Los Anjeles Lakers ranpòte yon viktwa tou mens deva San Antonio Spurs 102 a 97.

Football Ameriken

Houston Texksan konsève espwa l pou l kalifye nan faz final chanpyona football zèpòl kare a apre swif 31 a 13 li pase Denver Broncos yè swa. Teksan yo gen yon palmarès 7 viktwa 7 defèt pandan Broncos yo gen yon palmarès 6 viktwa 8 defèt.

Tennis

Seleksyon tenis feminen ameriken an ap rankontre ak Almay nan kar de final koup Konfederasyon an kap dewoule nan San Diego an Kalifòni dapre anons federasyon tenis ameriken an fè. Federasyon 2 peyi yo poko deziyè kap patisipe nan seleksyon an. Lòt rankont kar de final yo ap dewoule menm jou a ant la Rusi ak Izrayèl, Espay kont Itali epi la Frans kont la Chin.

XS
SM
MD
LG