Accessibility links

Espay pa gen Plan Akeyi Koup du mond Football 2018 la


Football

Federasyon football Espayòl la fè konnen li pa enterese nan chache akeyi koup du mond football 2018 la malgre pawòl kap pale kòm kwa Espay ta kapab mete ansanm ak Pòtugal pou akeyi konpetisyon an. Yon responsab federasyon football Pòtugè fè konnen li te diskute ide ak kèk responsab espayòl ki te kwè se yon bon ide.

Unyon Eropeyen an ansanm ak otorite football kontinan mande yon operasyon sere boulon kont vyolans nan football apre dènye ensidan ki te mete fanatik yo fas a la polis. Otorite Pòtugal ak Komisyonè Justis ak Enteryè Eropyen an prezante plan pou mete sou pye standa sekurite pandan rankont yo. Plan an te prezante pandan yon konferans la polis ak ekspè spòtif nan Brusèl an Bèljik.

Toujou sou kontinan Eropeyen an Milan AC kalifye pou 2 zièm tou chanpyon lig dè chanpyon Eropeyen an gras ak yon match nul 1 a 1 li fè ak Benfika de Lisbòn. Chelsea kalifye apre li wouze Rosenborg de la Norvèj 4 a 0. Nap konnen 8 pwochen kalifye yo disi 2 semen apre Real Madrid tonbe devan Werder de Brè m 3 a 2. Viktwa 4 a 1 Liverpool ranpòte devan FC Porto remete l nan kous la pou plas nan 8 tièm de final la.

David Beckham ak Los Anjeles Galaksi rive nan Nouvèl Zeland kote ekip la pral jwe yon match amikal jodi a. Tailand ranplase Taiwan kòm òganizatè koup Challenge 2008 la. Venkè a ap kalifye pou koup Azyatik la ki gen pou dewoule nan Katar an 2011. Tailand ap òganize konpetisyon an apre Taiwan pat kapab bay garanti lap satisfè tout kondisyon yo tounwa a ki reyuni 16 peyi ki klase piba sou kontinan Azyatik la.

Premye faz chanpyona nasyonal ayisyen an fini yè Mèkredi. Racing klub ayisyen, Roulado la Gonav, Asosyasyon Spòtif Gran Gwav ak AS Ti Rivyè desann nan 2 zièm divizyon. Cavaly Leogane ranpòte mayòl la depi avan dènye jounen an. Racing ki rele le vye lyon desann nan 2 zièm divizyon apre plis pase 80 lane ap doomine football ayisyen an. 8 premye ekip yo nan chanpyona nasyonal ayisyen an pral patisipe nan yon mini-chanpyona ki rele Super 8.

Basketball

Nan match ki dewoule yè swa nan NBA a Cleveland Cavaliers tonbe devan Detroit Pistons 109 a 74. Piston yo ap domine divizyon santral konferans de Lès la devan Cleveland ak yon match. Toronto ranpòte la viktwa devan Memphis Grizzlies 103 a 91. Washington Wizards tonbe devan San Antonio Spurs 109 a 94. Chanpyon an tit la San Antonio nan tèt divizyon Sudwès la ak 13 viktwa-3 defèt. Yao Ming make 31 pwen pou pèmèt Houston Rockets pilon-nen Phoenix Suns 100 a 94. Utah Jazz pat bay Filadelphia 76ers oken chans ak yon swif 106 a 95. Atlanta te fè anpil efò avan li kale Milwaukee 96 a 80. Minnesota tonbe devan Dallas 109 a 103. Golden State Warriors kale Sakramento Kings 103 a 96. Orlando woule Seattle 110 a 94 epi Portland fè bèk atè devan Indiana 95 a 89.

Tennis

Se jodi a tiraj osò final koup Davis ant Etazuni ak la Rusi ap dewoule nan Portland Oregon. Etazuni pral mize sou Andy Roddick ak James Blake pou match senp yo epi ekip doub la konpoze ak Bob ak Mike Bryant. Rus pare yon po kann ak tout foumi pou ameriken yo akoz prezans Nikolay Davydenko, Igor Andreev, Dmitry Tursunov ak Mikhail Youzhny.

Cyclisme

Yon tribunal Bèlj fè konnen li pap tande plent yon ansyen siklis depoze akoz plent menase lut kap mennen kont dopaj nan spö. Tribunal la di li pa gen juridksyon pou l tande hing ki mete fas a fas yon siklis Kazakstan ak Unyon Siklis Entènasyonal la ki baze nan vil Swis.

Kous bisiklèt Tour Almay la ap dewoule an 2008 malgre retrè konpayi telefòn T Mobil ki se prensipal patwon konpetisyon an.

XS
SM
MD
LG