Accessibility links

Breaking News

FIFA Konfime Brezil ap Akeyi Koup du Mond 2014 la


Football

Federasyon Football Entènasyonal la rekòmande pou Brezil akeyi koup du mond football 2014 la apre enspektè yo enspekte peyi a. Enspektè yo fè konnen Brezil kapab reyalize yon yon bon mondyal lè yo konsidere enfrakstrutur ak lòt enstalasyon . Komite Ekzekutif la ki resevwa rapò a ap fè yon anons ofisyèl Madi. Dènye fwa Brezil te òganize yon koup du mond se te an 1950 yon koup du mond yo te pèdu fas a Urugwe an final. Sa se youn nan pi move souvni brezilyen-yo.

Unyon Football Eropeyen an suspann pou 4 match football Ganeyen Eric Addo kap jwe nan PSV Eindovhen apre li te krache yon lòt footballè pandan yon match lig dè chanpyon. Suspansyon an aplike pou 3 pwochen match Lig dè Chanpyon Eropeyen an klub Olandè a. Si PSV Eindovhen pa kalifye Addo ap rate premye rankont Unyon football Eropeyen an.

Nouvèl ki soti nan peyi Almay fè konnen Joachim Loew ap rete kòm antrenè seleksyon an juskan 2010 dapre anons ki fèt. Loew gen yon palmarès 12 viktwa 1 nul ak 2 defèt. Kontra a kapab koute anviwon 3 milyon 400 mil dola chak ane.

Toujou ann Almay , Responsab yo pwolonje kontra antrenè seleksyon feminen juskan 2013 swa 4 semen apre seleksyon an ranpòte mondyal football feminen an. Silvia Neid ki deja ranpòte 2 tit koup du mond ak seleksyon an pral chache ede seleksyon an ranpòte yon meday pou je zolenpik -yo.

Federasyon footbal ameriken bò kote sou wout pou-l nonmen Kolonbyen Wilmer Cabrera kòm antrenè seleksyon kadè ameriken an ki baze nan yon sant spòtif nan Florida.

Epi bouyon boul-la te kontinue sou kontinan ewopeyen-an ” Apre Lig Chanpyon se te tou UEFA-a :Nan kad match ale UEFA a Bayern de Munik ranpòte yon viktwa de justès minit devan Etwal Wouj de Belgrad 3 a 2 na group F la. Nan group E a klub anglè Bolton fè match nil 1 a 1 ak klub Pòtugè Braga.. Atletico de Madrid fè match nul 3 a 3 ak Lokomotiv de Moskou. Villarreal fè match nul 1 a 1 ak Fiorentina. Bal kale Rennes 1 a 0. Se kèk pami rankont ki jwe nan premye Koup UEFA a. Match retou a fikse pou 8 Novanm. 3 premye nan chak group ap kalifye pou faz dechoukaj la.

Tennis

Findlandè Jarkko Nieminen kale chilyen Fernando Gonzalez pou l kalifye pou semi final tounwa tenis an sal Bal la an Swis 6-3, 7-5. Finlandè a pral rankontre nan semi final la demen Samdi a kont Chipriyòt Marcos Baghdatis ki elimine franse Paul Henri Mathieu 6-2, 7-6. Defèt la afekte espwa Gonzalez genyen pou l patisipe nan dènye tounwa tenis dè mèt Shangai la an Chin. Anviwon 20 jwè tenis dèyè 3 dènye plas ki disponib pou dènye tounwa a.

Rus Michail Youzhny ak espayòl Fernando Verdasco kalifye pou semi final tounwa tenis an sal St Petersburg la. Youzhny pral rankontre konpatriòt li Dmitry Tursunov ou byen Britanik Andy Murray. Verdasco bò kote pa l ap rankontre swa Kwat Marin Cilic ou byen Letonyen Ernest Gulbis. Venkè tounwa a ap resevwa yon prim 142 mil dola.

Rus Anna Chakvetadze elimine nan tounwa Generali Ladies an sal la kap dewoule nan Linz an Otruch. Chakvetadze pèdu devan Swis Patty Schnyder 6-1, 6-0. Schnyder pral rankontre venkè rankont ant franse Marion Bartoli ou byen Ukrenyen Julia Vakulenko. Lòt kalifye pou se Slovak Daniela Hantuchova kale Ukrenyen Alona Bondarenko 6-4, 1-6, 6-3. Venkè tounwa a ap resevwa 88 mil 265 dola.

Basketball

Responsab basketbal ameriken David Stern fè konnen plis pase 56 abit vyole règleman ki refize abit yo al jwe haza nan kazino. Responsab la yo pap pran oken sanksyon kont abit sa yo akoz règleman an pase mòd.

Olympics

Katar ki nan gòlf Pèsik la lanse kandidatu pou l tounen premye peyi nan zòn nan ki kapab akeyi yon Je Zolenpik an 2016. Katar te òganize ak suksè je Azyatik yo an 2016. Yon gwo obstak se ogmantasyon tanperatu a pandan Juyè ak Out ki kapab monte juska 40 degre celcius. Règleman olenpik yo entèdi je yo dewoule an sal. An kontre pati Katar pral pwopoze pou l je dewoule nan mitan mwa Oktòb si yo responsab yo dakò. An plis de Katar lòt vil ki kandida se Chikago, Tokyo, Madrid, Rio de Janeiro, Prag ak Bakou kapital Azerbaijan. Komite Olenpik entènasyonal ap anonse vil kandida a an 2009.

XS
SM
MD
LG