Accessibility links

Direktè Sante Publik Ayisyen an Mande Populasyon an Pa Utilize 2 Dantifris Ki Reprezante yon Danje Pou Lavi Moun


Ministè Sante Publik nan peyi Dayiti lanse yon kanpay sansibilizasyon jodi madi 22 me a nan 10 depatman jeografik yo pou mande pèp ayisyen an pa utilize 2 pat dantifris ki rele Excel ak Mr. Cool ki poze yon danje pou lavi kretyen-vivan. Direktè jeneral Sante Publik la, Gabriel Thimothee, lanse apèl sa a nan mikwa jounalis Jean-Pierre Leroy.

Antretan, reprezantan gouvènman kanadyen an, anbasadè Claude Boucher, akeyi ak satisfaksyon deklarasyon prezidan Ayiti a, René Préval, ki anonse nan fen semèn pase lansman yon kanpay anti-kowupsyon tribòbabò nan administrasyon publik la pou dechouke fleyo sa a. Msye Boucher di Canada deside apiye prezidan Préval nan batay sa a ak nan lut pou retabli sekurite nan repiblik karibeyen an. Rotchild François jr. ap devlope pwen sa depi vil Pòtoprens. Nan vil Gonaïves menm, komès lekòl ak administrasyon publik te fèmen madi 22 me a. Pou yon 2zyèm jou youn apre lòt manifestan desann nan lari pou denonse asasinay Alix Joseph, direktè pwogramasyon Radyo Tele Provincial enkoni touye semèn dènye e yo mande lapolis rapousuiv e arete koupab yo ak tout moun kap simaye ensekirite ak laterè nan Site Endpandans lan.

Epi, kolaboratè nou, Chérubin Dorcil, pale ak militant Marlène Bastien--responsab òganizasyon Fam Ayisyen nan Miami--ki isit Washington D.C pou rankontre ak kèk palmantè e di yo ki sa nan je gwoup lap defann yo (imigran aayisyen yo) li kwè ki ta merite chanje nan pwojè-lwa Imigrasyon Kongrè ameriken an dwe koumanse debat nan jou kap vini yo pou detèmine sò ak statu imigran san dokiman legal kap viv depi dèzane Ozetazuni.

Fè yon ''klik'' gòch sou ralonj ki anlè atik sa a pou n' koute devlopman tèm sa yo.

XS
SM
MD
LG