Accessibility links

Preparatif Koup Dò KONKAKAF la Pou Fen Mas la


Football

Panama ap rankontre ak Ayiti demen Samdi a nan stad Orange Bowl la nan Miami avan li rankontre ak Jamayik nan Kingston Lendi 26 Mas la. Gwadloup kap patisipe pou la premyè fwa nan Koup dò KONKAKAF la ap akeyi Trinidad and Tobago Samdi 24 Mas nan Gosier.

Menm Samdi a Kosta Rika ap akeyi Nouvel Zeland. Honduras ap rankontre ak El Salvador nan Lockhart Stadium nan Fort Lauderdale Dimanch. 2 ekip yo ap rankontre nan Cary an Karolin du Nò Madi 27 Mas la. Kanada ki ranpòte Koup dò KONKAKAF la prale nan Bermud kote li pral rankontre seleksyon lokal la le Dimanch 25 Mas. Meksik ap akeyi Paragwe nan Nuevo Leon Dimanch la avan li mete tèt pou Etazuni kote li pral rankontre ak Ekwatè nan Oakland Kalifòni Mèkredi.

Etazuni ap rankontre Ekwatè nan Tampa Bay le 25 Mas avan li rankontre ak Gwatemala nan Frisco Tekzas le 28 Mas. Tout rankont sa yo rantre nan kad match chofe jarèt pou seleksyon kap patisipe nan Koup dò KONKAKAF la Ozetazuni pandan été a.

Unyon Football Eropeyen an kondane klub franse Lille pou l peye plis pase 65 mil dola amand pou ensidan ki te pase nan 8 tièm de final klub la te jwe ak Manchester United. Manchester United gen pou l peye plis pase 10 mil dola amand pou move konpòtman fanatik yo. Balon pral woule demen Samdi a sou kontinan Eropeyen an nan kad eliminatwa Ero 2008 yo-pami rankont yo ki atire atansyon fanatik yo nou jwen Frans-Lituani epi Angletè / Izrayèl.

Basketball

Kansas, UCLA, Ohio State ak Memphis kalifye pou final rejyonal tounwa basketball Mas an foli a. Nan rejyon Wès la Kansas remonte yon defisi pou l kale Southern Illinois 61 a 58. Kansas pral rankontre ak UCLA nan final rejyonal Wès la. UCLA kalifye apre danse sou Pittsburgh 64 a 65. Nan rejyon Sud la Memphis suprann Tekzas A and M ak yon viktwa de justès 65 a 64 pou l al rankontre an final ak Ohio State ki remonte yon defisi 20 pwen pou elimine Tennessee 85 a 84. Jodi a semi final rejyonal la ap rapousib.

Kobe Bryant tounen 4 trièm jwè nan istwa NBA a ki make o mwens 50 pwen pou pipiti pandan 3 rankont afile. Bryant make 60 pwen nan viktwa 121 a 119 Los Anjeles Lakers ranpòte devan Memphis Grizzlies. Bryant ajoute nonn sou lis la ansanm ak Michael Jordan, Elgin Baylor ak defen Wilt Chamerlain. Chikago Bulls ranpòte yon viktwa de justès 109 a 108 devan Denver Nuggets gras ak yon 2 pwen debutan Tyrus Thomas make 1 sekond avan fen tan reglemantè a. Houston Rockets danse sou Detroit Pistons 91 a 85. Portland Trail Blazers te fè anpil efò avan li kale New York Knicks 96 a 86 epi Phoenix Suns woule Sakramento Kings 118 a 100.

Tennis

Ansyen numewo 1 mondyal tenis feminen ameriken Serena Williams te monte yon maswife avan kale Ukrenyen Yuliana Fedak 75, 6-2 nan tounwa tenis Key Biscayne nan kap dewoule nan Miami Florid. Bò kote mesye yo Arjanten Guillermo Canas elimine Britanik Tim Henman 3-6, 6-2, 6-1. Alman Florian Mayer ak Simon Greul Mayer kalifye pou 2 zièm tou a.

XS
SM
MD
LG