Accessibility links

Sen Vensan e Grenadin ak Bermud Kalifye pou Faz Final Koup Digicel la


Football

Sen Vensan e Grenadin ak Barbad kalifye pou faz final koup Digicel la kap dewoule nan Trinidad and Tobago an 2007. Sen Vensan kalifye apre viktwa 3 a 2 yo ranpòte devan Bahamas apre Barbad fè match nul 1 a 1 ak Bermud.

Nan group H la Guyan kalifye apre 2 zièm viktwa yo ranpòte. Guyanè te kale Antigua e Barbuda 6 a 0 Vandredi epi yè Dimanch yo kale Gwadeloup 3 a 2. Guadeloup kale Republik dominikèn 3 a 0 Vandredi men dominiken yo konsève espwa yo apre yo kale Antigua e Barbuda 2 a 0 yè Dimanch la. Demen nap konnen dènye kalifye a lè Antigua e Barbuda ap rankontre ak Gwadeloup epi Guyan kont Republik Dominikè n.

Etazuni ranpòte koup dò KONKAKAF la kategori feminen apre viktwa 2 a 1 li ranpòte an pwolongasyon devan Kanada yè Dimanch la nan Kalifòni. Etazuni ak Kanada deja kalifye pou faz final koup du mond Football feminen kap dewoule an Chin an 2007. Meksik woule Jamayik 3 a 0 pou l al jwe yon match de baraj kont Japon pou detèmine dènye plas ki disponib pou koup du mond la.

Egl nwa ranpòte chanpyona nasyonal ayisyen an seri retou a gras ak yon viktwa 1 a 0 yo ranpòte pandan arè de je yo devan Cavaly de Leogan. Asosyasyon Spòtif Kapwa ki tap pare pou selebre tit la apre viktwa 1 a 0 yo te ranpòte devan Baltimore de Sen Mak te pran yon sezisman lè ekip Bèlèr la make yon gòl kou fran dapre Alter Press.

Tiraj osò pou chnapyona football Azi du Sudès yo ap dewoule an tandèm nan Sengapour ak Tailand. Group A , kap jwe nan Bangkok ap gen landan Malezi. Birmani, Filipin ak Tailand ki ranpòte konpetisyon an 3 fwa. Sengapour ki se chanpyon an tit la ap akeyi group B a kap gen ladann Laos, Vyetnam ak Endonezi. 2 premye nan chak group yo ap kalifye pou semi final la.

Se aswè a nap konnen loreya balon dò Frans Football la ki seleksyone pi bon footbalè kap evolye sou kontinan pou sezon 2006 la. Football Brezilyen Ronaldinho te ranpòte sezon 2005 la. Nouvèl kap pale fè konnen se Italyen Fabio Cannavaro ki an tèt pou 51 nièm edisyon balon dò a ke Brezilyen Ronaldinho te ranpòte ane pase.

Seleksyon football Iranyen an ke FIFA te sispann, kapab patisipe nan Je Azyatik yo kap kòmanse Vandredi, dapre yon desizyon tanporè federasyon football entènasyonal la pran.

Responsab Bayern de Munich Karl Heinz Rummenigge menase klub alman an kapab abandone group G-14 la ki reyuni klub football ki pi rich sou tè a akoz chak klub ap pase ak pwò enterè yo.

Prezidan FIFA a Sepp Blatter plenyen jodi a pou di klub rich yo achte twòp footbalè sa ki kreye yon fose ant klub rich yo ak klub ki pi pòv yo--sutou sou kontinan Eropeyen kote gen yon anbouteyaj. Msye Blatter fè deklarasyon sa a nan Dubai nan okazyon rankont ant direktè ak prezidan pi gran klub ki ekziste sou planèt la.

Msye Blatter mande pou gen yon solisyon nan dezekilib sa a. Fanatik yo FC Barselòn yo te leve kanpe Samdi pou aplaudi youn pami pi bèl gòl footballè brezilyen Ronaldhino make nan viktwa 4 a 0 devan Villarreal. Real Madrid ranpòte yon viktwa tou mens devan Valans 1 a 0 nan okazyon 12 zièm jounen chanpyona Espayòl la. An Almay Werder De Brèm pase Bielefeld yon rankle 3 a 0 gras ak 2 gòl Miroslav Klose make. Bayern de Munik te fè anpil efò avan li kale Hambourg 2 a 1.

An Angletè Manchester United fè match nul 1 a 1 ak Chelsea. An Itali Inter de Milan kale Palerme 2 a 1 pou l rete nan tèt chanpyona seri A nan okazyon 13 zièm jounen an.

Indianapolis Colt danse sou Philadelphia Eagles 45 a 21 pou l kontinye domine chanpyona football zèpòl kare ak yo.

Tennesse Titans remonte yon defisi 21 pwen pou l kale New York Giants 24 a 21. San Diego Chargers woule Oakland Raiders 21 a 14. Washington Redskins te fè kè fanatik yo kontan ak yon viktwa 17 a 13 yo ranpòte devan Carolina Panthers 17 a 13. New Orleans Saint ap domine divizyon NFC Sud la apre yo kale Atlanta Falcons 31 a 13. Aswè a Green Bay Packers pral lakay Seattle Seahawks.

Basketball

Toronto Raptors pran swen Indiana Pacers ak yon viktwa 92 a 83-yon rankont Raptors domine depi nan debu juskala fin. Los Anjeles Lakers ranpòte 5 kièm viktwa an 6 rankont fwa sa a se New Jersey Nets ki tonbe 99 a 93. Los Anjeles Clippers tonbe devan Denver Nuggets 103 a 88. Phoenix Suns woule Portland Trail Blazers 119 a 101 pandan San Antonio Spurs woule Seattle Supersonics 98 a 78.

Atlèt 2 kore yo ap mache ansanm nan seremoni douvètu Je Azyatik yo kòmanse Vandredi nan Katar. Kore du Nò pwopoze pou 2 Kore yo gen yon ekip unifye pandan je zolenpik yo an 2008.

XS
SM
MD
LG