Accessibility links

Breaking News

Otomobilis Franse Luc Alphand Ranpòte 12 zièm Etap Rally Dakar la


Rally Dakar

Otomobilis franse Luc Alphand ranpòte 12 etap kous otomobil ak motosiklèt Dakar la ki kouvri 368 kilomèt ant Bamako o Mali ak Labe nan Guine devan konpatriòt li Guerlain Chicherit ak Sud Afriken Giniel De Villiers. Franse Cyril Despres ranpòte kategori motosiklèt la. 13 zièm etap la ap kouvri yon distans 567 kilomèt ant Labe akTambacounda nan Lès Senegal. Konpetisyon ap fini Dimanch nan Dakar O Senegal.

Football

Olenpik Lyon ranpòte yon bèl viktwa 2 a 1 devan Marseille nan okazyon 21 nièm jounen lig football franse a. Ak viktwa a Lyon pran kontinye ap dodomeya nan klasman jeneral la ak yon total 50 pwen devan Bordo ki gen 36 pwen.

Antrenè seleksyon Hongri a Lauthar Matthaus anonse li jwen yon antant pou l antrene klub brezilyen Atletico Paranaense. Kontra Mathaus ap fini ak seleksyon Bèlj la nan fen ane 2007.

Antrenè seleksyon Angle a Swedwa Sven-Goran Eriksson fè konnen angle yo nan menm nivo ak Brezil, Arjantin, la Oland Almay ak La Frans--sa vle di angle yo kapab ranpòte koup du mond Almay 2006 la. Pi lwen Angle yo rive nan yon koup du mond, apre yo te ranpòte koup du mond la an 1966, se te nan demi final fas Almay ki te kale yo sou tir de penalite an 1990.

Footbalè Brezilyen Ronaldo gen pou objektif bat rekò alman Gerd Muller te bat nan ane 70 yo lè l te make 14 bu pou alman yo . Ronaldo aktuelman make menm kantite bu ak konpatriot li Pele swa yon total 12 bu.--Ronaldo, kap fè 4 trièm vwayaj nan yon koup du mond, bezwen 3 gòl pou l pase devan Gerd Muller. Msye di premye objektif li se ede Brezilyen yo ranpòte koup du mond la pou yon 6 zièm fwa.

Antrenè Atletiko de Madrid arjanten Carlos Bianchi revoke akoz movèz pèfòmans klub la renmèt nan chanpyona espayòl la. Ekip la pa ranpòte oken viktwa depi fen Oktòb.Arjanten an mande responsab yo peye-l plis pase 6 milyon dola li genyen nan kontra a kap fini an Jwen 2007.

Antrenè klub Franse Ajaccio Rolland Courbis pèdu djòb la apre defèt 2 a 0 klub la subi devan FC Nantes-defèt ki mete klub la piba nan klasman jeneral la.

Real Madrid pral chache wè si-l ta travèse 8 tièm de final koup Espay la lè lap rankontre ak Atletiko Bilbao nan stad Santiago Bernabeu. Real Madrid te ranpòte match ale a 1 a 0. Responsab yo mande jwè fè efò pou klub la kapab ranpòte yon tit pou fè kè fanatik yo kontan.

Atletisme

Federasyon Atletis Entènasyonal la fè konnen kourè ameriken kategori 400 mèt ameriken Michael Johnson ak franse Marie Jose Perec ofri youn pami unifòm yo te konn sèvi pou vann sou yon sit entènèt. Lajan an pral sèvi pou koz umanitè kap pataje ant 3 òganizasyon: Òganizasyon pou Alimantasyon ak Agrikultu, Unicef ak Program Alimantè Mondyal. Michael Johnson se detantè rekò du mond 200 a 400 mèt mondyal aloske Perec se doub chanpyon nan menm kategori a.

Tennis

Jwè tenis Bèlj Sesil Karatantcheva ap planifye pou ale an apèl devan Tribunal dAbitraj Spòtif apre federasyon tenis entènasyonal la frape l 2 zan suspansyon pou tèt li te teste pozitif pou steroyid pandan tounwa tenis Roland Garos la. Responsab kapab elimine tout rezulta, klasman, lajan li resevwa apre li te teste pozitif. Karatantcheva, ki gen 3 semen pou l ale an apèl ak desizyon an, di rezon ki fè tès la revele yon wo nivo nandrolòn se akoz li te ansent sann pat konnen--yon ansent ki fini ak yon avòtman.

Espayòl Anabel Medina Garrigues ak Sud Koreyen Cho Yoon-jeong kalifye pou final tounwa entènasyonal Canberra International la kap dewoule an Ostrali.

Tchèk Iveta Benesova ap rankontre an final ak Michaella Krijicek nan final tounwa tenis Hobart la.

Kwat Mario Ancic elimine chanpyon sòtan tounwa tenis Heineken nan chilyen Fernando Gonzalez 6-0, 6-3 pou l kalifye pou semi final tounwa tenis Oakland la. Msye pral rankontre ak Swis Stanislas Warinka. Lòt semi final la ap mete bab pou bab Bèlj Olivier Rochus ak Findlandè Jarkko Nieminen.

Ostralyen Lleyton Hewitt elimine nan kar de final tounwa tenis Sydney International la devan Italyen Andreas Seppi 4-6, 7-5, 7-5. Seppi pral rankontre ak Rus Igor Andreev ki elimine Rus Dmitry Tursunov 6-2, 3-6, 6-4. Nikolay Davydenko kalifye nan semi final la apre Tailandè Paradorn Srichaphan abandone match la akoz yon zòbòy nan pye. Davydenko pral rankontre ak ameriken James Blake ki elimine franse Arnaud Clement 3-6, 6-1, 6-4.

Bò kote meda m yo Belj Justine Henine Hardenne ap rankontre an final Italyen Francesca Schiavone nan final tounwa. Henine Hardenne elimine Rus Svetlana Kuznetsova 6-3, 6-1 aloske Schiavnone pat gen difikilte pou l kale Tchèk Nicole Vaidisova 6-4, 6-3. Tounwa sa yo konsidere kòm tounwa chofe jarèt avan debu tounwa tenis Open Ostrali a -premye tounwa tenis Gran Shelem pou ane a.

NBA

New York Knicks te lute tankou mèt Jan Jak pou l kale Dallas Mavericks an pwolongasyon 117 a 115. Sa fè New Yorkè 5 kièm viktwa afile yo ranpòte apre yo tap penyen lage nan debu sezon an.. Washington Wizards danse sou Atlanta Hawks 103 a 72. Indiana Pacers pilon-nen Milwaukee Bucks 112 a 88. Philadelphia 76ers tonbe devan Utah Jazz 110 a 102. Toronto Raptors kapote Carolina Bobcats 95 a 86. Minnesota Timberwolves te fè anpil efò avan li kale Chikago Bulls 99 a 93.. Houston Rockets tonbe devan Sakramento Kings. Portland Trailblazers tronse Los Anjeles Lakers 113 a 103. Seattle Supersonics te fè menm man parèyman ak Orlando Majik ke li kale 113 a 104 epi Miami Heat pilon-nen Golden State Warriors 110 a 96.

Sèvis Postal Ameriken dedye yon nouvo tenb pou komemore je zolenpik divè Turen 2006 yo nan yon seremoni ki dewoule nan Kolorado Springs.

XS
SM
MD
LG