Accessibility links

Breaking News

FIFA Ranvwaye Rankont li ta Pral Fè sou Ensidan Turki a


Football

Komite disiplinè FIFA ki te gen pou reyuni sou ensidan vyolan nan okazyon match de baraj kalifikatif koup du mond ant Turki ak la Swis ranvwaye pou 6 et 7 Fevriye. Komisyon an ap ankete sou jwè, antrenè ak ofisyèl Turk ansanm ak yon yon jwè ak yon ofisyèl swis ki ta mele nan lese frape a. Komite a di li bezwen tande plis depozisyon sou deba a. FIFA pral pwononse l apre tiraj osò Koup Deròp dè Nasyon Euro 2008 an ki gen pou dewoule an tandèm ant la Swis ak Otrich.

Real Madrid ta renmen jwen sèvis aryè santral Arsenal la Ashley Cole pou ranplase vid Roberto Carlos kapab kite nan ekip la. Roberto Carlos, ki sot jwe 330 tièm rankont pou Real Madrid, bat rekò kòm jwè etranje ki jwe plis match devan ispano/arjanten Alfredo Di Stefano.

Atakan Italyen Alessandro Del Pierro tounen meyè butè pou Juventus de Turen apre 3 gòl li make yè swa nan viktwa 4 a 1 kont Fiorentina nan 8 tièm de final koup d’Itali a. Seleksyon nasyonal afriken kòmanse publiye lis jwè yo ki pral reprezante peyi nan Koup dAfrik dè Nasyon ki pral dewoule nan Ejipt soti 20 Janvye pou rive 10 Fevriye.

Etazuni gen pou rankontre ak Gwatemala 19 Fevriye nan Frisco Tekzas nan kad preparatif yap fè pou koup du mond almay 2006 la. An plis de rankont sa a ameriken yo gen pou rankontre Kanada 22 Janvye, la Norvèj le 29 Janvye epi Japon le 10 Fevriye.

Atletisme

Kourè ameriken dorijin Kenyan Bernard Lagat dwe tann yon ti bout tan avan li kouri anba drapo ameriken an. Vis Chanpyon Olenpik la te pran nasyonalite ameriken an Mars 2004 e li sèlman revele verite a an Avril 2005. Msye dwe tann juskan 2007 pou l reprezante Etazuni nan yon konpetisyon entènasyonal. Kourè ameriken Meb Keflezighi konfime patisipasyon nan maraton Boston an le 17 Avril. Keflezighi ki te fini 3 zièm nan maraton New York la, ap patisipe pou la premyè fwa nan maraton Boston an.

Basketball

Aswè a pral gen kèk bèl rankont basketball bò kote univèsitè yo lè Numewo 1 Univèsite yo Duke pral mate balon fas ak Univèsite Maryland ki klase 21 nièm. Indiana ki klase numewo 8 pral tope kòn li kont Michigan State.

Lakay pwofesyonèl yo Detroit Pistons pral lakay San Antonio Spurs epi Los Anjeles Lakers ap akeyi Cleveland Cavaliers. Carmello Anthony make 2 pwen pandan 3 zièm pwolongasyon pou ede Denver Nuggets ranpòte yon viktwa 139 a 137 devan Phoenix Suns. New York Knicks danse sou Cleveland Cavaliers 92 a 84. Boston Celtics te fè anpil efò avan li kale Atlanta Hawks 98 a 94. Carolina Bobcats ranpòte yon viktwa tou mens devan Houston Rockets 111 a 106. Minnesota Timberwolves tonbe devan Milwaukee Bucks 95 a 92. Menphis Grizzlies pilon-nen Sakramento Kings 99 a 85. Detroit woule New Orleans Saints 96 a 86. San Antonio Spurs te fè tout sa li kapab pou l kale New Jersey Nets 96 a 91. Los Anjeles Clippers woule Orlando Majik 90 a 73.

Tennis

Kwat Mario Ancic elimine adolesan Ekosè Andy Murray 6-3, 7-6 pou l kalifye pou kar de final tounwa tenis Oakland la nan Nouvèl Zeland. Ancic pral rankontre ak chanpyon sòtan an Chilyen Fernando Gonzales ki elimine Tchèk Ivo Minar 6-1, 6-3. Lòt jwè ki kalifye pou kar de final la se Espayòl David Ferer. Findlandè Jarkko Nieminen.,Olandè Olivier Rocheus Chilyen Nicolas Massu, Swis Stanislas Wawrinka ak alman Florian Mayer.

Olandè Michaella Krijicek ap rankontre ak Jelena Kostanic demen Jedi a nan kad semi final tounwa tenis Hobart la. Lòt semi final la ap mete bab pou bab Iveta Benesova pral jwe kont Mara Santangelo.

Espayòl Anabel Medina Garrigues kalifye pou semin final tounwa tenis Canberra International la. Garrigues pral rankontre Izrayelyen Shahar Peer. Lòt semi final la ap mete bab pou bab Kolonbyen Catalonia Cassation kont Sud Koreyen Cho Yoon-jeon.

Numewo 2 tenis mondyal feminen an Bèlj Kim Clijsters pran yon zòbòy yon semen avan debu premye tounwa tenis Gran Shelem pou ane a. Manmzèl blese pandan li tap boukante balon ak Italyen Francesca Schiavonne. Sepandan Bèlj Justine Henin Hardenne kalifye pou semi final tounwa tenis Sidney International la pou l al rankontre ak Rus Svelatna Kuznetsova. Bò kote mesye yo Llyeton Hewitt kalifye pou kar de final apre li elimine Otruchyen Jurgen Melzer 6-1,

Numewo 1 tenis Mondyal la Swis Roger Federer elimine nan tounwa tenis Kooyong Classic nan Melbourn. Se Alman Tommy Haas ki elimne Federer 3-6, 6-4, 6-4.

Chanpyon sòtan tounwa tenis Open Ostrali a Rus Marat Safin deklare fòfè nan tounwa a kap kòmanse Lendi nan Melbourne. Numewo 12 mondyal la di rezon an se akoz yon pwoblèm nan jenou. An plis de Marat Safin ki deklare fòfè nou jwen ameriken Andre Agassi, Espayòl Rafael Nadal.

Rally Dakar

Sud Afriken Giniel de Villiers ranpòte 11 zièm etap Rally Dakar la o Mali. 12 zièm etap la ap kouvri yon distans 872 kilomèt ant Bamako ak ak Labe an Guine. Franse Peterhansel toujou nan tèt klasman jeneral la ak ak plis pase 25 minit. CN-74 Cycling / Hamilton Siklis ameriken Tyler Hamilton mande tribunal spòtif ameriken an pou anule suspansyon 2 zan lap fè fas pou uzaj anabolizan. Responsab yo bezwen plizyè semen avan yo pran yon desizyon.

XS
SM
MD
LG