Accessibility links

Martina Hingis Retounen an Fòm


Tennis

Ansyen numewo 1 tenis mondyal feminen Swis Martina Hingis retounen nan sikwi tenis pwofesyonèl la ak yon viktwa li ranpòte devan Venezuelyen Maria Vento-Kabchi 6 a 2, 6-1 nan okazyon tounwa tenis Gold Coast la an Ostrali. Hingis konsidere tounwa a kòm yon tounwa tenis chofe jarèt avan al patisipe nan tounwa tenis Open Ostrali a -premye tounwa tenis Gran Shelem pou ane a.

La Oland kale Arjantin 2 set a 1 pandan ke Sèbi ak Montenegro kale la Swèd sou menm skò a nan tounwa tenis Hopman pa ekip la kap dewoule nan Perth an Ostrali.

Nan tounwa tenis Adelaide la Espayòl Tommy Robredo ak Kwat Mario Ancic kalifye pou 2 zièm tou tounwa tenis Adelaide la--yon tounwa ki antre nan kad preparatif pou tounwa tenis Open Ostrali a premye tounwa tenis Gran Shelem pou ane a. Bò kote meda m yo Swis Patty Schnyder, Italyen Francesca Schiavone ak Rus Dinara Safina, Flavia Pennetta, espayòl Anabel Medina Garrigues ak Nuria Llagostera Vives, Slovak Jarmila Gajdosova, Ostrichyen Sybille Bammer ak ameriken Angela Haynes kalifye pou pwochen tou tounwa tenis Gold Coast la an Ostrali.

Jounal spòtif franse l’Ekip, nonmen jwè tenis Swis Roger Federer kòm dè chanpyon pou ane 2005 la.

Otomobilis

Patisipan yo nan kous otomobil Pari / Dakar la kòmanse premye etap sou kontinan Afriken an lè yap kouvriyon distans 314 kilomèt O Maròk.

Football

Footbalè brezilyen Ronaldhino swete ane 2006 la pou l yon pibon footbalè ke jan l ye kounye a. Prezidan klub espayòl Real Madrid Florentina Perez, mande jwè yo pou degaje yo tankou mèt Jan Jak pou bay klub la yon tit kelke swa sakrifis sa mande. Real Madrid, ki trouve a 11 pwen dèyé lidè chanpyona F C Barselòn, kalifye pou 8 tièm de final lig dè chanpyon Europeyen an. A kelke mwa koup du mond Almay 2006 la kesyon ap poze pou konnen ki seleksyon ki pral detwone brezil sou tròn-nan. Plizyè faktè an favè breilyen yo. Chanpyon du mond an tit, venkè koup konfederasyon an ak Kopa Amerika, 2 balòn dò Europeyen, meyè jwè FIFA pou ane a. San konte difikilte antrenè seleksyon an Carlos Alberto Parreira genyen pou l mete sou pye yon vrè seleksyon nasyonal akoz tout jwè yo bon.

Football Ameriken

Sezon regulye chanpyona football zèpòl kare a fini ak Washington Redskins ki kalifye pou faz final la apre yon tronse Philadelphia Eagles 31 a 20 nan yon rankont ki te chaje ak suspens. Nan faz final la kap kòmanse Samdi Redskins pral rankontre ak Tampa Bay Buccaners ki ranpòte tout divizyon NFC Sud la apre yo woule New Orleants Sants 27 a 13. Carolina Panthers ki danse sou Atlanta Falcons 44 a 11 pral rankontre ak New York Giants. Nan konferans ameriken an Pittsburgh Steelers kale Detroit Lions 35 a 21 pou l kalifye. Cincinnati Bengals, ki te deja kalifye, tonbe devan Kansas City 37 a 13. New England Patriots, ki te deja kalifye, fè bèk atè dean Miami Dolphins 28 a 26 pandan ke Indianapolis Colts te monte yon maswife avan yo kale Arizona Cardinals 17 a 13. Green Bay Pakers woule Seattle Seahawks 23 a 17.

NBA

Miami Heat wouze Minnesota Timberwolves 97 a 70. Utah Jazz te pwofite absans Kobe Bryant pou l ranpòte yon viktwa tou mens devan Los Anjeles Lakers 98 a 94. Bryant ap purje yon suspansyon 2 match pou bosal li te fè ak pandan rankont Lakers yo tap jwe ak Memphis. Los Anjeles Clippers te pase yon bon moman apre yo kale Portland Trailblazers 100 a 94.

XS
SM
MD
LG