Accessibility links

Spò Aktyalite 6/27/05


NBA / Tiraj Osò

Se demen Madi a nan New York tiraj osò NBA a ap demare pou seleksyon jwè ki pral jwe nan klub yo. 3 franse ap pran chans yo nan tiraj osò a. La Chin kale Kore du Sud 73 a 67 poul ranpòte chanpyona basketball feminen ki tap dewoule nan Changai. Taiwan kale Japon 73 a 62 pou l konsole l ak 3 zièm plas la ak yon meday de bronz. La Chin, Kore du Sud ak Taiwan kalifye pou koup du mond basketball feminen ki gen pou dewoule o Brezil an Septanb 2006

Tennis

Tounwa tenis Wimbledon nan ap rapousib jodi a lè ameriken Lindsay Davenport ap rankontre ak Bèlj Kim Clijsters pandanke Swis Roger Federer pral boukante rakèt ak Espayòl Juan Carlos Ferrero. Nan lòt rankont ki deja jwe franse Marie Pierce kalifye pou kar de final la apre viktwa an 2 manch li ranpòte devan Italyen Flavia Penneta 6-3, 6-1. Franse Amelie Marausmo elimine Rus Elena Lkhovtseva 6-4, 6-0. Ameriken Venus Williams kale Jill Craybas ki te elimine Serena Williams 6-0, 6-2 epi franse Mary Pierce kont Italyen Flavia Penneta.

Bò kote mesye yo ameriken Andy Roddick ap rankontre ak Arjanten Guillermo Coria, ostralyen Lleyton Hewitt elimine ameriken Taylor Dent an 4 manch. Franse Sebastien Grosjean ap jwe kont Rus Dmitry Tursunov. Arjanten David Nalbadian elimine franse Richard Gasquet 6-4, 7-6

Football/ Abitre

Federasyon football Italyen an pwolonje de yon lane laj yon abit kapab abitre match--laj la pase a 46 zan olye de 45--Desizyon kap bay abit Pierluigi Collina yon lòt ane pou l kontinye abitre rankont an Itali ak an Euròp eksepte match koup du mond Almay 2006 la. Collina ki gen reputasyon entènasyonal elu 5 fwa kòm pibon pami pibon abit entènasyonal pandan 28 tan karyè.

Semi final koup du mond Juniò kap dewoule nan La Oland ap mete bab pou bab Brezil kont Arjantin epi Maròk kont Nijerya--Oken ekip Afriken poko ranpòte konpetisyon an--Nijerya kalifye pou final yon fwa pandan ke Gana fè 2 tantativ la 2 fwa men san suksè. Brezil, ki se chanpyon sòtan an ranpòte trofe a 4 pou mete yo a egalite ak Arjantin ki ranpòte konpetisyon an 4 fwa tou.

Tout 32 seleksyon kap patisipe nan koup du mond football Almay 2006 la dwe soumèt yon dosye medikal ke tout jwè an bòn sante fizik e ke yo pa gen pwoblèm kè dapre yon anons FIFA fè nan okazyon anivèsè lanmò football Kamerounè Marc Vivien Foe pandan koup semi final koup Konfederasyon an.

FIFA anonse lap anvizaje pou l mande tout 32 ekip yo pou fè tès dròg sou tout jwè avan dewoulman konpetisyon an. Responsab FIFA yo site kòm ekzanp responsab Federasyon football Meksiken an ki teste jwè nan seleksyon an avan dewoulman koup Konfederasyon an--tès ki te jwen Aaron Galindo ak Salvador Carmona teste pozitif Seleksyon football femimen ameriken an kale Kanada 2 a 0 nan kad yon match amikal chofe jarèt.

Arjantin ap rankontre ak Brezil nan kad final koup Konfederasyon Almay 2005 la. Arjanten yo rive nan final la apre yo kale Meksik sou tir de penalite 6 a 5 apre tan reglemantè a te fini nul 1 a 1 an pwolongasyon. Final la ap dewoule nan Franckfurt pandan ke Meksik ap jwe match konsolasyon an ak Almay nan Leipzig. Alman yo te tonbe devan Brezil Samdi 3 a 2.

Klub Arjanten Velez Sarsfield ranpòte chanpyona premyè divizyon Arjanten an apre viktwa 3 a 0 devan Independiente. Klub football Turinwa (FC Torino) monte nan chanpyona premyè divizyon Italyen an malgre li pèdu 1 a 0 devan Perouz nan yon match de baraj. Torino, ki ranpòte chanpyona premyè divizyon an 7 fwa te desann nan 2 zièm divizyon depi sezon 2003 a. Torino, ki te ranpòte match ale a 2 a 1, kalifye akoz li te fini an meyè pozisyon nan klasman jeneral 2 zièm divizyon an devan Peruz.

Volleyball / Plaj

Brezil kale la Swis 2 set a 0 pou l ranpòte meday dò nan chanpyona mondyal Volebòl de plaj ki tap dewoule nan Berlen an Almay.

Atletisme

Atlèt ameriken Justin Gatlin tounen premye atlèt an 20 tan ki ranpòte tout konpetisyon atletis ameriken yo. Gatlin ranpòte final kous 100 ak 200 mèt la konpetisyon an ki tap dewoule nan Carson an Kalifòni. Viktwa ki ba l dwa reprezante Etazuni nan chanpyona mondyal atletis ki gen pou dewoule nan Helsinki, Finland an Out pwochen. Lòt atlèt ki kalifye Kerron Clement ki kouvri kous 400 mèt Haies a an 47 sec. Chanpyon 400 mèt Hè Dominiken Felix Sanchez di li espere ranpòte yon 3 zièm tit lè lap patisipe nan chanpyona du mond Atletis la nan Helsinki an Out pwochen.

OLYMPICS--DRUT

Ansyen Minis Spò franse , Guy Drut, pa fè pati komite kap fè efò pou Pari òganize Je Zolenpik yo an lan 2012 an atandan li klarifye nonn anba akuzasyon li tap touche 3800 dola nan yon konpayi san li pa travay. Ansyen Minis la di li inosan e li pa vle eskandal korupsyon an afekte posibilite pou Komite Olempik Entènasyonal la ta seleksyone vil Pari pou òganize konpetisyon an. Komite Olempik Entènasyonal la ap fè anons la le 6 Juyè nan Sengapour.

Natasyon

Ero Olenpik Ameriken Michael Phelps ranpòte yon 3 zièm tit nan kous natasyon kap dewoule nan Santa Clara an Kalifòni. Phelps, ki gen 19 van, ranpòte kous 200 mèt la yè Dimanch la apre li te deja ranpòte kous 200 mèt naj lib la ak 100 mèt papiyon an Samdi san bliye kous 100 mèt naj lib la.

Judo/Chanpyon Judo Japonè Ryoko Tani fè konnen li pap patisipe nan koup du mond Judò feminen ki gen pou dewoule nan vil Kèr an Ejipt akoz li ansent. Manmzèl marye ak jwè baseball Japonè Yoshitomo Tani.

Minis Justis Sud Koreyen anonse ansyen manb Komite Olempik Entènasyonal la Kim Un-yong figure pami 700 prizyone kap libere sou pawòl Jedi kap vini la a. Kim te kondane pou l pase 2 zan prizon apre otorite yo te kondane l pou magouyè. Msye Kim pa janm ensiste kondanasyon an ak anprizonman an pa chita sou anyen e ke li pa koupab krim otorite yo te reproche l kòm kwa li ta men-nen bèl vi apre li depanse plis pase 3 milyon dola fon lajan òganizasyon spòtif ki te anba kontwòl li.

XS
SM
MD
LG