Accessibility links

Spò Aktyalite 4/29/05


NBA

Faz final NBA a ap rapousib aswè a lè Detroit Pistons pral lakay Philadelphia 76ers. Memphis Grizzlies ap akeyi Phoenix Suns epi Seattle Supersonics ap fè yon kout pye lakay Sakramento Kings.

Nan match ki jwe yè swa (Jedi) Miami Heat kale New Jersey Nets 108 a 105 malgre Vince Carter make 36 pwen e fòse yon 2 zièm pwolongasyon. Miami Heat ap domine seri a ak 3 viktwa 0 defèt. Reggie Miller make 33 pwen pou ede Indiana Pacers ranpòte yon viktwa 99 a 76 devan Boston Celtics kap domine seri a 2 a viktwa kont 1 defèt. Se dènye faz final Reggie Miller ap jwe avan li pran retrèt li. Nan konferans de Lwès-la Alman Dirk Nowitzki make 28 pwen pou ede Dallas Mavericks ranpòte yon viktrwa 106 a 102. Rockets yo ap men-nen seri 2 a 1.

Tennis

Rus Dinara Safina ak Chinwa Li Na kalifye pou semi final tounwa tenis Estoril la kap dewoule nan Portugal. Safina kale ameriken Jill Craybas 6-4, 6-2. Bò kote pa l Li pase Malgach Dally Randriantefy 2 kout rakèt 6-3, 6-1. Nan semi final la Arjantin Gisela Duklo ap rankontre ak Lucie Sarapova bò kote mesye yo Arjanten Gaston Gaudio kalifye pou kar de final la gras ak yon swif li pase Espayòl Feliciano Lopez 6-2, 6-2. Espayòl Tommy Robredo pat gen pwoblèm pou l kale Italyen Davide Sanguinetti 6-2, 6-2.

Toujou nan tenis alman Tommy Haas pase nan kar de final tounwa tenis B-M-W ak difikilte devan Ostralyen Wayne Arthurs 7-6, 7-6.

Nan tenis de tab( ping-pong) chanpyon olenpik ak mondyal chinwa Zhang Yining ap nan tèt delegasyon chinwa ki pral patisipe nan chanpyona du mond tenis de tab kap dewoule demen Samdi nan Shangai. Final la fikse pou Samdi 6 Me.

Ciclisme

Siklis Italyen Alessandro Petacchi ranpòte 2 ziém etap Tour Normandi a pandan li pran tèt klasman jeneral la ak 8 sekond.

Football

Ansyen abit Alman ki te mele nan skandal kout lajan pou trafike match football resevwa yon suspansyon avi nan lig football Alman an Yon lòt kote responsab klub football angle Manchester United rejte òf ameriken Malcolm Glazer fè pou l pran kontwòl klub la. Responsab yo di yo pa gen plan prezante òf 1 milya edmi dola Glazer fè bay aksyonè ekip-la pandan yo ba li juska 17 Me pou-l ofri plis lajan ou byen retire tantativ lap fè pou l achete klub la. Glazer gen anviwon 28 pou 100 aksyon nan klub la.

Olenpik

28 federasyon spò olenpik yo ap òganize yon reyunyon ekstraòdinè nan vil Jenèv an Jwen pwochen pou diskute yon pwopozisyon ki kapab detèmine avni yo--Delege yo pral konnen si disiplin spòtif yo reprezante a ap prezan nan je zolenpik 2012 yo. Chak disiplin bezwen 51 pou 100 vwa pou l kontinye konsidere kòm yon spò olenpik--delege yo ap konsidere tou si yo dwe aksepte gòlf, karate kòm nouvo disiplin olenpik.

XS
SM
MD
LG