Accessibility links

Spò Aktyalite 3/30/05


NBA

Finalman Los Anjeles Lakers mete fen nan 8 defèt li sot subi nan NBA a apre li geri bosko l sou New York Knicks ak yon viktwa 117 a 107. Nan Cleveland Cavaliers yo pat rankontre oken difikilte pou kale Los Anjeles Clippers 94 a 84. Seattle Supersonics ranpòte yon viktwa tou mens devan Memphis 102 a 99. Shaquille O’Neal kontinye ap byen men-nen ak Miami Heat ki wouze Toronto Raptors ak yon viktwa 103 a 91.

Tennis

Ameriken Venus Williams mete fen nan 3 zan rèy Serena Williams ke li pat kale nan yon tounwa tenis. Venus kale Serena an 2 manch 6-1, 7-6 pou l kalifye pou semi final tounwa tenis Key Biscayne nan. Venus pral rankontre nan semi final la ak Rus Maria Sharapova ki elimine Bèlj Justine Henin-Hardenne 6-1, 6-7, 6-2.

Bò kote mesye yo numewo 1 tennis mondyal la Swis Roger Federer kalifye pou kar de final gras ak yon swif li pase Kwat Mario Ancic 6-3, 4-6, 6-4. Andre Agassi kalifye pou kar de final la apre li kale arjanten Gaston Gaudio 7-6, 6-2. Espayòl Rafael Nadal ak David Ferrer kalifye pou kar de final la.

Football

Balon pral woule sou tè a jodi a nan kad match kalifikatif koup du mond Almay 2 mil 6 la. Nan Konkakaf la Etazuni ap akeyi Gwatemala nan Alabama Meksik ap fè yon kout pye lakay Panama epi Kosta Rika pral woule balon lakay Trinidad and Tobago. Sou kontinan Europeyen an youn pami rankont kap jwe se vizit la Frans ap fè lakay Izrayèl. Espay anba gwo presyon nan moman yap pare pou rankontre ak Sèbi-Montenegro. Angletè kapab pa rankontre ak anpil difikilte lè yap rankontre ak Zaerbaijan. Yè Madi a Bolivi bat Venezuela 3 a 1 nan kad match kalifikatif koup du mond pou zòn Amerik du Sud la. Jodi a Brezil pral lakay Urugwe. Pewou ap akeyi Ekwatè, Arjantin ap resevwa Kolonbi epi Chili ap fè yon kout pye lakay Paragwe. Irland kale la Chin 1 a 0 yè Madi a nan kad yon match amikal entènasyonal ki jwe nan Dublen.

XS
SM
MD
LG