Accessibility links

Spò Aktyalite 1/28/05


Tennis/ Open Australie

Ameriken Lindsay Davemport pèdu nan final doub tounwa tenis Open Ostrali a nan moman lap prepare pou l rankontre ak ameriken Serena Williams nan final senp la demen Samdi a. Nan Semi final maskulen an ameriken Andy Roddick tonbe devan Ostralyen Lleyton Hewitt an 3 manch a 1. Hewitt pral rankontre ak Rus Marat Safin Dimanch. Safin rive nan final la apre li te elimine Swis Roger Federer nan lòt semi final la.

NBA

San Antonio kontinye ap amelyore pèfòmans li nan lig basketball ameriken an apre viktwa 90 a 80 yo ranpòte devan Sakramento Kings. Spurs yo gen yon palmarès 35 viktwa 10 defèt. Charlotte Bobcats kontinye ap monte yon maswife nan lig la. Yè Jedi a Bobcats yo tonbe devan Chikago Bulls 101 a 93. Sa fè 10 zièm defèt afile ekip Charlotte la subi. Detroits Pistons danse sou Indiana Pacers 88 a 76 nan Indianapolis--2 zièm fwa 2 ekip yo rankontre depi deblozaj ki te pete sa gen 2 mwa.

Karl / Nuggets

Denver Nuggets nonmen George Karl kòm nouvo antrenè ekip la. Karl, kap ranplase Michael Cooper, gen yon palmarès 708 viktwa 499 defèt pandan 16 zan karyè nan lig la kote li antrene 5 ekip ki ranpòte tit divizyon epi kalifye 2 fwa an semi final( Seattle Supersonics an 1996 ak Milwaukee Bucks an lan 2 mil 1). Msye te antrene seleksyon basketbal ameriken ki te klase 6 zièm nan koup du mond basketball la an lan 2002

CONCACAF U-20

Meksik ap rankontre ak Jamayik epi Honduras pral mate balon fas a Kanada aswè a nan San Pedro Sula, Honduras nan kad youn nan kwadrangulè final eliminatwa koup du mond Juniò pou group B. 2 premye yo ap kalifye pou faz final la ansanm ak 2 lòt kap soti nan group A a kap dewoule Ozetazuni.

Almagne / Scandal

Abit Alman Robert Hoyzer rekonèt li te fè magouy pou ede yon seri de klub nan chanpyona Alman an ranpòte la viktwa. Abit la, ki te rejte akuzasyon yo nan yon premye tan, deklare tout akuzasyon yo se verite e ke li prezante ekskuz li bay federasyon football alman an. Hoyzer rekonèt li te fè magouy nan viktwa 4 a 2 S-C Paderborn te ranpòte devan Hamburg ane pase san bliye 4 lòt rankont pou pipiti kote li foure nan pòch li plizyè santèn milye dola nan paryaj. Federasyon Alman an di pou evite jan de pwoblèm sa yo yap anonse abit ofisyèl rankont yo 2 jou alavans olye de 10 jou pandan yap kontinye louvri je sou abit yo.

Lut International

Kèk pami meyè lutè mondyal aksepte envitasyon pou vinn patisipe nan yon konpetisyon lut entènasyonal nan Kolorado Springs soti 5 pou rive 6 Fevriye.

Box

Boksè Ougandè Kassim Ouma pral defann tit Federasyon Entènasyonal Boks pwa mwayen nan Atlantik Citi Samdi kap vini la a fas ak Ganeyen Kofi Jantuah.

XS
SM
MD
LG